Ацы аз уацмысыл æххæст кæны 90 азы
Мариинаг театры симфонион оркестр Дзæуджыхъæуы равдыста Сергей Прокофьевы музыкалон аргъау «Петя æмæ бирæгъ». Ацы аз уацмысыл æххæст кæны 90 азы. Цæгат Ирыстоны ахуырады министрады æмæ рухстауæн акцийы æххуысæй 700 сывæллонæй фылдæр федтой легендарон постановкæ æмæ базонгæ сты классикон музыкæйы дунеимæ. Бæлвырддæр радзурдзæн Хъайтмазты Дзерассæ.
Оркестримæ ахæм зонгæдзинад æвзонг аивадуарзджытæн у хорз гæнæн симфонион музыкæйы дунемæ абалц кæнынæн. Хъазгæйæ æмæ хуымæтæг æвзагæй Марина Ядых сывæллæттæн дзуры цæвгæ æмæ фугæнгæ инструментты тыххæй. Уый фæрцы рæзгæ фæлтæрæн æнцондæр уыдзæн бамбарын Сергей Прокофьевы симфонион аргъау «Петя æмæ бирæгъ»-ы мидис.
Оркестры музыкантты курдиаты руаджы сæйраг хъайтартæ сывæллæттæн дзурынц ныфсхастдзинады æмæ хæлардзинады тыххæй истори. æмæ мæнæ сценæйæ рауад цъæх фæз, флейтæйы зæлтимæ фæзындис цъиу, йæ фарсмæ та гобой æрбахуыдта бабызы. Музыкалон инструментты фæрцы райгуырд Петяйы æмæ бирæгъы фæлгонц.
Мариинаг театры симфонион оркестры сæйраг дирижер Гугкаты Зауырбег Дзæуджыхъæумæ ссыд сæрмагондæй ацы аивадуарзджытимæ сæмбæлынмæ. Аргъау «Петя æмæ бирæгъ»-ыл ацы аз æххæст кæны 90 азы. Легендарон уацмысмæ бакастысты 700 ахуырдзауæй фылдæр республикæйы алы скъолатæй. Бирæтæн ацы балц уыд фыццаг зонгæдзинад классикон музыкæимæ.
Залы сты, фæлладуадзæн рæстæг скъолаты цур дзæбæхгæнæн фæзты чи ис, уыцы сывæллæттæ. Мариинаг театры филиалы концертон зал бабæрæг кæныны гæнæн сын фæцис рухстауæн акцийы фæрцы. æххæст æй кæны культурæйы артдзæст республикæйы ахуырады æмæ наукæйы министрады æххуысæй.
Ныр музыкæ ис ацы лæппуты æмæ чызджыты царды дæр. Мариинаг театры симфонион оркестры артисттæ сын равдыстой классикон музыкæйы алывæрсыгдзинад. Гæнæн ис, æмæ сæ уый сразæнгард кæндзæн культурæйы историимæ лæмбынæгдæр зонгæ кæнынмæ.
