Гергиты Валерийæн арфæ ракодта сæргълæууæг Сергей Меняйло
Мариинаг театрыл æххæст кæны 240 азы. 30 азæй фылдæр та йын разамынд дæтты не мзæххон Гергиты Валерий. Бирæ азты Мариинаг театр æмæ маэстро адæмы хъуыдыйы сты æппæт дунейы дæр дæнцæгæн хæссинаг чи у, ахæм бæрзонд аивадон иудзинад. Æгæрон музыкалон курдиат, разамонæджы æууæлтæ, стæй музыкæмæ стыр уарзондзинад тых æмæ æхцон æнкъарæнтæ дæттынц театры аивадон разамонæгимæ бирæ азты чи кусы, уыцы адæмæн дæр. Мариинаг театрæн филиал ис Цæгат Ирыстоны дæр. Уыимæ, Дзæуджыхъæуы дыууæ фæзы: оперæ æмæ балеты театр, стæй концертон зал. Театры 240 азы кадæн Гергиты Валерийæн арфæ ракодта Сæргълæууæг Сергей Меняйло. Сабаты та Дзæуджыхъæуы ацæудзысты Мариинаг театры гастрольтæ. Уыцы бон филиалы дыууæ сценæйы дæр арæзт æрцæудзысты симфонион музыкæйы концерттæ. Гастрольтæ байгом кæндзæн театры симфонион оркестр, йæ сæргъы Гергиты Валерий, афтæмæй. Бæрæггонд куыд у, афтæмæй сфæлдыстадон къорд нæ республикæмæ сласдзысты нырмæ дзы кæй нæ равдыстой, ахæм цымыдисаг программæ.
