Бабæрæг кодта республикæйы клиникон рынчындон, федта ифтонгдзинад
Медицинæйы рæзт. Цæгат Ирыстонмæ ссыд нæ бæстæйы сæйраг æнæштатон специалист-трансплантолог Сергей Готье. Бабæрæг кодта республикæйы клиникон рынчындон, федта ифтонгдзинад. Фæстæдæр аныхас кодта пациенттимæ. Чехойты Фатимæ радзурдзæн бæстондæр.
Республикон клиникон рынчындоны ацыд ног уырг трансплантаци скæнынæн фыццаг операци. Кокайты Олег бирæ азты тыхсти уыргты иугæндзон низæй. Уый тыххæй йын æдзух кæнын хъуыдис гемодиализ. Ныртæккæ нæлгоймаджы уавæр у хорз, дохтырты цæстдардæй цæуы реабилитаци.
Операцитæгæнæн агъуыстыты ифтонгдзинад техникон фæрæзтæй æмæ дохтырты цæттæдзинад сбæлвырд кæныны тыххæй Цæгат Ирыстонмæ ссыд Уæрæсейы æнæниздзинадхъахъхъæнынады министрады æнæштатон трансплантолог Сергей Готье. Бæстæйы раззагдæр специлисттæй иу базонгæ республикон клиникон рынчындоны куыстимæ, аныхас кодта дохтыртимæ æмæ медицинон хотимæ.
Дохтырты ныхæстæм гæсгæ, трансплантологийы рæзт ахсджиаг у уæззау низтæй рынчын адæмæн. Уыдонæн ахæм операцитæ бирæ хæттыты вæййынц цæрынæн иунæг фадат.
Медицинон куыстуат æххæст у хъæугæ материалон-техникон фæрæзтæй. Операцитæгæнæн æмæ реанимацийы хайæдты ис нырыккон ифтонггæрзтæ – рæуджытæн хъæугæ аппараттæ, сæрмагонд реанимацион сынтæджытæ æмæ æндæр медицинон техникæ. Уыдоны руаджы республикон клиникон рынчындоны дохтыртæн фадат ис зын, бæрзонд технологон операцитæ кæнынæн.
Трансплантологийы рæзтмæ рынчындон цæттæ кодта цалдæр азы. Дохтыртæ ацыдысты ахуыртæ Уæрæсейы æмæ фæсарæнты раззагдæр медицинон куыстуæтты. Республикон клиникон рынчындоны дохтырты ныхæстæм гæсгæ, уыргты трансплантацийы программæ дарддæр æххæстгонд цæудзæн. Нысангонд сты ног операцитæ, радон хъуамæ скæной апрелы.
