1-æм поликлиникæйы ахæм центр кусы фаронæй нырмæ
Коронавирусы инфекцийы рапарахатæй тæссаг кæй у, уымæ гæсгæ Сергей Меняйло бахæс кодта амбулаториты æмвæзадыл куыст фæкарздæр кæнын. Иуæй-иу медицинон куыстуæтты байгом кодтой ковид-центртæ. 1-æм поликлиникæйы ахæм центр кусы фаронæй нырмæ. Специалисттæ адæмæн кæнынц тестытæ, æмæ бæрæг кæнынц, инфекци сæм ис, æви нæ, уый. Ифтонг сты хуымæтæг тестытæй, стæй экспресс ПЦР тестытæй. Бынаты кусы КТ центр дæр. Иу ныхасæй, фадат ис диагностикæ уыцы иу ран скæнынæн. лæггад кæнынц æрмæст ацы поликлиникæмæ чи хауы, уыцы адæмæн нæ, фæлæ се ппæтæн дæр. Ис дзы æртæ мобилон бригады дæр, уыдон та рынчынтæм цæуынц хæдзармæ. Иу бонмæ лæггад кæнынц 50 адæймагæн. Фадæттæ дзы ис, æнæ искæйы æххуысæй йæ бон цæуын кæмæн нæу, ахæм адæмæн дæр. Бахъуаджы рæстæг куысты фæтк фæкарздæр кæндзысты медицинон ахуыргæнæндæтты студенттæй дæр.
