Цæствæлдахджытæй хи куыд бахъахъхъæнæн ис, уый тыххæй дзырдтой бирæуæладзыгон хæдзæртты цæрджытæн.
Мидхъуыддæгты министрады кусджытæ республикæйы æппæт районты сарæзтой егъау профилактикон рейд. Цæствæлдахджытæй хи куыд бахъахъхъæнæн ис, уый тыххæй дзырдтой бирæуæладзыгон хæдзæртты цæрджытæн. Ахæм æмбарынгæнæн куыст ма бакодтой дуканиты, паркты æмæ æндæр фæлладуадзæн бынæтты. Акци арæзт у – адæмы бахъахъхъæнын, интернеты æмæ сыл чырæ телефоны уылты сайд куыд нæ цæуа, уымæй. Инспектортæ ма адæмæн байуæрстой информацион буклеттæ, æмбарынгæнæн æрмæгимæ. Профилактикон рейды тыххæй бæлвырддæр радзурдзæн Фидараты Маринæ.
Адæм зæрдиагæй хъусынц пъæлицæйы кусджытæм. Бирæтæ дзурынц сæ фæлтæрддзинады тыххæй. Уымæн æмæ ныртæккæ цæстфæлдахæн митæ тынг сарæх сты, уæлдайдæр та хистæр кары адæмы хсæн. Фæлæ зæгъын хъæуы уый дæр, амæ бирæ хæтты адæм сæхи сайын нал бауадзынц.
Пъæлицæйæгты акцимæ се вæрæн бахастой Мæздæджы цæрджытæ æмæ æхсæнадон архайджытæ дæр. Районы цæрджытæн дзурынц æмæ æмбарын кæнынц, интернеты æмæ чырæ телефонты уылты цæстфæлдахджытæ цы сайæн митæ кæнынц, æмæ сæ хи куыд бахъахъхъæнæн ис, уый тыххæй.
Стыр æргом барадхъахъхъæнæг кусджытæ здахынц ацæргæ адæммæ. Уымæн æмæ ацы категори фылдæр хæттыты бахауы фыдгæнджыты къухтæм. 2019-æм азы Мидхъуыддæгты министрады Мæздæджы районы хайады цы цæстфæлдахæн цаутæ бахынцтой, уыдонæн сæ фылдæры хъыгдард баййæфтой районы цæрæг пенсиисджытæ.
Мæздæггаг пъæлицæйæгтæ, профилактикон мадзæлттæ æххæст кæнгæйæ, æмархайд кæнынц социалон службæтимæ, банкты кусджытимæ, æхсæнадон организацитимæ æмæ постхæсджытимæ.
Куы йæ зонай, уæд фыдгæнджытимæ тох кæнын æнцондæр у. Адæм пъæлицæйы кусджытæн зæгъынц бузныджы ныхæстæ, ахæм пайда акци кæй сарæзтой, уый тыххæй. Цы зонындзинæдтæ райстой, уыдон сын фадат ратдзысты сæхи сайдæй бахъахъхъæнынæн.
