Фæсивæдæн радзырдтой ног горæт-спутник «Симды Дæлвæз»-ы проекты тыххæй
Республикæйы арæзтады æмæ архитектурæйы министр Бетанты Марат специалистты къордимæ фембæлд Цæгат Кавказы хæххон металлургон институты студенттимæ. Фæсивæдæн радзырдтой ног горæт-спутник «Симды Дæлвæз»-ы проекты тыххæй. Фæзындзæн Горæтгæрон районы, æмæ дзы уыдзæн цæрæн кварталтæ, скъолатæ, рæвдауæндæттæ, инфраструктурæйы æндæр объекттæ. Аразæн куыстытæ нысан кæнынц ацы аз райдайын. Проектимæ базонгæ кæнынæн хæххон металлургон институты студентты хуымæтæджы нæ равзæрстой. Ацы уæлдæр ахуыргæнæндоны минæвæрттæ сты фидæны аразджытæ, архитектортæ æмæ проекттæ аразджытæ. Уыдонæн сæ бон уыдзæн сæхи хъæппæристæ бацæттæ кæнын, проект царды рауадзынæн. Æмæ æрмæст уый нæ. Фадат ма сын уыдзæн фæлтæрдджын специалисттимæ иумæ, «Симды Дæлвæз» аразыны архайынæн дæр.
