филиал вгтрк государственная телерадиовещательная компания “Алания”

Московскийы уынджы 54-æм хæдзары кæрты ис дыууæ хъазæн фæзы. Иу дзы сарæзтой суанг Советон Цæдисы рæстæджы. Иннæ та сын у депутаты лæвар.

Фæлæ дзы иу дæр куыд æмбæлы, афтæ нæу. Тæссаг сты сывæлæтты æнæниздзинадæн. Сæ хъаст кæссынц алы рæттæм, фæлæ сынкуыд æмбарынц кæнынц афтæмæй Дзæуджыхъæуы администрацийы уынаффæмæ гæсгæ ныр бирæфатерон хæдзæртты кæртыты цы хъазæн фæзтæ ис, уыдонмæ закъонмæ гæсгæ хъуамæ зилой цæрджытæ сæхæдæг.

Ацы хъазæн фæз Московскийы уынджы 54-æм хæдзары кæрты арæзт æрцыд Советон рæстæджы. Схъомыл дзы ис сывæллæтты цалдæр фæлтæры. Ныртæккæ хъазæн бынат хъæуы бындуронæй цалцæг кæнын. Зæгъæм, къуыбырæй йæхи рауадзыны тыххæй сывæллоны хъæуы хистæрты æххуыс. Уымæн æмæ тæссаг у, йæхи куы ныццæва, уымæй.

Хæдзары кæрты хъазгæйæ сывæллæттæ сæхи тынг арæх ныццæвынц. Уымæн æмæ хъазæн æргмæджытæ се *ппæт дæр базæронд сты.

Кучиты Светланæ, Московскийы уынджы 54-æм хæдзары цæрæг: «Чи дзы цонгсастæй ацæуы, чи къахсастæй ацæуы, чи та йæ сæр ныццæвы. Мæхи внук дзы дыууæ хатты, фарон дæ рæмæ æндæр аз дæр, йæ сæр ныццавта. Æмæ йын аирвæзыны æнхъæл нæ уыдыстæм. Нæй сæ ныууадзæн иунæгæй. Сæ качелитæ кæд афæлдæхдзысты, уый бæрæг нæй. Æмæ сæхи цæвынц».

Ацы кæрты ма ис ноджыдæр иу хъазæн фæз. Уый та Московскийы уынджы 54-æм хæдзары сабитæн сæвæрдта республикæйы парламенты депутат Тменаты Сослан. Фæлæ цæрджытæ куыд зæгъынц, афтæмæй баззад æрдæгарæзтæй. Сывæллæттæн дзы хъазынæн æмбæлгæ уавæртæ арæзт не рцыд. Тменаты Сослан сæтты, ирхæфсæн фæз кæронмæ арæзт кæй не *рцыд, ууыл. Куыстытæ баурæдтой уымæн, æмæ фæз Дзæуджыхъæуы администрацийы бæрны бакæнын нæ бантыст. Депутат куыд зæгъы, афтæмæй хъазæн фæзмæ хъуамæ цæрджытæ сæхæдæг дæр зилой, уымæн æмæ сæ сывæллæтты у. Ныртæккæ хæдзары кæрты ис дыууæ хъазæн фæзы, фæлæ дзы иуы дæр æмбæлгæ уавæртæ нæй.

Плиты Алыксандр, Дзæуджыхъæуы администрацийы информацион хайады хицау: «Куыд зонæм, афтæмæй уыцы хæдзары кæрты ис дыууæ хъазæн фæзы. Иу дзы конд æрцыд советон рæстæджы, иннæ та ныр, фæлæ рæстмæ конд нæу. Æмæ уыцы хæдзары цæрджытæ куы равзарой иу адæймаджы, хъазæн фæзæн дзуапп чи дæтдзæн, уæд уый хъуамæ ныхас кæна администрацийы кусджытимæ, цæмæй æрцæуой, феной, цы уавæрты сты, æмæ гæнæн ис, уыцы дыууæ фæзы дæр райхалдзысты æмæ дзы сæвæрдзысты ног. Кæннод та сцалцæг кæндзысты сæ иу, сæ иннæ, сæ уавæртæм гæсгæ».

Дзæуджыхъæуы администрацийы уынаффæмæ гæсгæ ныр бирæфатерон хæдзæртты кæртыты цы хъазæн фæзтæ ис, уыдонмæ хъуамæ закъонмæ гæсгæ зилой цæрджытæ сæхæдæг, бахъуады рæстæг сæ хъуамæ кæной цалцæг дæр.

Ныртæккæ бирæфатерон хæдзары кæрты сывæллæттæн хъазæн фæз саразынæн Дзæуджыхъæуы администрацийы ис 100 курдиаты. Иу хъазæн бынат скæнынæн горæты бюджетæй хардзгонд цæуы 300 мин сомы бæрц. Афтæмæй Дзæуджыхъæуы иу афæдзмæ фæзыны 20 ног хъазæн фæзы.

Московскийы уынджы 54-æм хæдзары цæрджыты хъæуы иумæйаг фыстæг Дзæуджыхъæуы администрацимæ бахæссын. Рады куы слæууой, уæд, гæнæн ис, æмæ иннæ аз ацы кæрты сывæллæттæн фæзына, æмбæлгæ уавæртæ арæзт кæм ис, ахæм хъазæн бынат.