«Вовкæ аргъæутты бæстæйы» хъайтартæ сдзырдтой ирон æвзагыл. Республикæйы ахуырад æмæ наукæйы министрад æмæ студи «Эксперт-Медиа»-йы иумæйаг проект æххæстгонд цæуы æнтыстджынæй.
«Вовкæ аргъæутты бæстæйы» хъайтартæ
сдзырдтой ирон æвзагыл. Республикæйы ахуырад æмæ наукæйы министрад æмæ
студи
«Эксперт-Медиа»-йы иумæйаг проект æххæстгонд цæуы æнтыстджынæй.
Сывæллæттæм мадæлон æвзагмæ цымыдисдзинад æвзæрын кæнынц нырыккон
технологитæм гæсгæ. Фæлæ, советон мультипликацион кинонывтæ национ
æрмдзæфæй саив кæнын æнцон хъуыддаг нæу. Ирон æвзагмæ сæ тæлмац кæнынц
лингвистты, психологты æмæ æндæр специалистты æххуысæй. Уæвгæ,
фехъусынæй фенын хуыздæр.
Советон мультипликацион ныв «Вовкæ
аргъæутты бæстæйы» ремейк чысыл Томайты Дзерассæ æмæ Æрчеккаты Къостайы
зæрдæмæ фæцыд. Раст зæгъгæйæ иу, иуæй иу дзырдты нысаниуæгæй бафарстой
сæ ныййарджыты. Дзерассæйы мады хъуыдымæ гæсгæ, мультипликацион нывты
хъайтарты дæнцæгмæ гæсгæ йæ чызг цыбыр рæстæгмæ иронау сдзурдзæн.
«Вовкæ аргъæутты бæстæйы» ирон æвзагыл у
æртыккаг мультфильм. Афæдзы размæ студи «Эксперт-Медиа» рауагъта фыццаг
фæлварæн проект. Эксперимент фæрæстмæ. Цæгат Ирыстоны цæрджытæм
сæвзæрын кодта стыр цымыдисдзинад.
Республикæйы адæмон артисткæ Черчесты
Дианæ кастингмæ æрбакодта йæ лæппуйы. Æркасты размæ йын Дианæ цавæрдæр
амындтытæ куы кодта, уыцы рæстæг режиссертæ бамбæрстой, сæйраг хъайтарæн
тæлмацгæнæг кæй ссардтой, уый.
Кадиты Тамарæ хъайтартæн тæлмацгæнджытæ афтæ зæрдиагæй агурдта, æмæ йæхæдæг дæр рæстæгмæ сси «Сызгъæрин кæсаг».
Тæлмацгæнджыты размæ хуымæтæг хæстæ вæрд
нæ уыди. «Вовкæ аргъæутты бæстæйы» мультипликацион нывыл æдæппæтæй
куыста 30 адæймаджы. Аргъауы хъайтартæ сдзырдтой зындгонд ирон артистты
хъæлæстæй. Цыргъзонд Василисæйы сурæты йæхи бафæлвæрдта паддзахадон
телерадиокомпани «Алани»-йы уацхæссæг Хъамболты Розæ.
Ацы мультипликацион ныв интернеты
хызæджы федтой сæдæ мин хаттæй фылдæр. Ирон æвзагыл анимацитæ
зæрдæмæдзæгæ сты куыд кæстæртæн, афтæ хистæртæн дæр. Иннæ аз та
сывæллæттæ лæвары хуызы райсдзысты ирон æвзагыл компьютерон хъæзтытæ.
Проект аразджытæм ма ис æндæр фæндтæ дæр. Нысан кæнынц сæхи анимацион
киноныв саразын.
