Бæлвырддæр зæгъгæйæ та сын чи нæ фиды, уыдонмæ.
Муниципалитетты разамонджытæ æмæ ресурстæй ифтонггæнæн организациты бæрнон кусджытæ хъуамæ бæстон кæсой æмæ сæ цæст дарой газæн æмæ электрон тыхæн фиддонтæм. Бæлвырддæр зæгъгæйæ та сын чи нæ фиды, уыдонмæ. Уый тыххæй ведомствоты хсæн кусæг къорды æмбырды фехъусын кодта Битарты Вячеслав. Республикæйы разамонæг куыд загъта, афтæмæй, коммуналон лæггæдтæн хæстæ чи дары, уыцы адæмы номхыгъд хъуамæ дыууæ къуырийы размæ бадæттой бынæттон хиуынаффæйады оргæнтæм. Уый фæстæ та хъуамæ æмгуыстад цæуа ресурстæдæттæг организацитимæ. Фыццаджыдæр стыр æргом здахын хъæуы фæкæсынхъуаг æмæ бирæсывæллонджын бинонтæм, стæй инвалидтæм. Бынæттон администрациты разамонджытæ хъуамæ бæстон æркæсой уавæрмæ, æмæ сын баххуыс кæной хæс бафидынæн. Цæрæнуæтты-коммуналон хæдзарады, артаджы æмæ энергетикæйы министр Таматы Майрæны ныхæстæм гæсгæ, 2019-æм азы Цæгат Ирыстонмæ æрдзон газ æрбауагътой 6 миллиарды æмæ 471 милуан сомы аргъæн. Фиддонты бæрц та схызт 80%-мæ. Фарон электрон тых схардз кодтой 5 миллиарды æмæ 294 милуан сомæн, фиддонтæ та уыдысты 89%-æй чысыл фылдæр. Организацитыл дзургæйæ, профилон министр загъта – республикон бюджетæй фæрæзтæ чи исы, уым сабыргай фыст цыдысты кредитты хæстæ. Ахæм уавæр ис, муниципалон бюджетæй чи исы фæрæзтæ, уыцы организациты дæр. Йæ раныхасы ма Таматы Майрæн йе ргом аздæхта цæрæнуæтты-коммуналон комплексы куыстуаæтты фиддонтæм. Чи нæ фиды, уыдоны хсæн сты хæдзæртты хицæутты æмбаладтæ, разамынддæттæг компанитæ æмæ æндæр цæрæнуæтты-эксплуатацигæнæн куыстуæттæ. Æмбырды ма æрдзырдтой Дзæуджыхъæуы хъармдæттæг хызты куыстуаты уавæрыл дæр. Уым нысангонд æрцыдысты ног конкурсон разамонæг, ног æххæстгæнæн директор. Æмæ фæстаг дыууæ мæймæ фиддонты дисциплинæ фæхуыздæр. Ныхасы ма Битарты Вячеслав бахаста фæндон, алы мæй дæр муниципалитетты сæргълæуджыты архайды фæдыл дзуапдæттæн куыст кæнын. Ома хъармдæттæг организацитимæ куыд кусынц, уый тыххæй. Уæлдай æргом – коммуналон фиддонты уавæрмæ.
