Иууылдæр сты Мæскуыйы аивадон уæлдæр ахуыргæнæндæтты рауагъдонтæ – цыппар скульпторы æмæ дыууæ нывгæнæджы. Хицæнтæй сæ куыстытæ æвдыстой Цæгат Ирыстоны æмæ Мæскуыйы.
Василий Суриковы номыл аивадон институты рауагъдон Хъайтмазты Хетæг равдыстмæ бахаста 30 куысты. Æвдыст дзы цæуынц ирон адæмы æгъдæуттæ, æндæр адæмыхæттыты æмæ бæстæты культурæ. Хицæн бынат ахсынц Лев Толстойы «Хаджи-Мурат»-мæ иллюстрацитæ. Хетæгæн музыкалон библиотекæйы æрæджы уыд сæрмагонд равдыст. Куы йын загътой, ис ног экспозици бацæттæ кæныны фадат, уæд фæдзырдта йæ хæлæрттæм – Мæскуыйы аивадон уæлдæр ахуыргæнæндæтты рауагъдонтæм.
Хъайтмазты Хетæг, равдысты архайæг: «Нæ тыхтæ хъуамæ иууылдæр радтæм, цæмæй нæ культурæ, нæ аивад, нæ киноиндустрийæ бæрзонддæр уой, цæмæй нæ фыдæлты бынæттæ рæсугъд уой, уый у нæ райсомы бон».
Адæмы размæ се сфæлдыстад рахастой Хайты Ибрагим, Хъайтмазты Хетæг, Черчесты Таймураз, Зæнджиаты Таймураз, Абайты Марат æмæ Деметы Ибрагим. Æдæппæтæй равдысты ис 60 куысты: нывтæ æмæ скульптурæтæ. Сæ тематикæмæ гæсгæ сты алхуызон: портреттæ, национ, историон мотивтæ, æрдзон композицитæ.
Зæнджиаты Таймураз, равдысты архайæг: «Фæахуыр кодтам Мæскуыйы, уым фæцардыстæм, ныр æрцыдыстæм. Уым цæуыл ахуыр кодтам, цы куыстам, уый равдисæм, уый тыххæй».
Равдысты архайджытæ нывкæнынады фыццаг къахдзæфтæ кодтой Цæгат Ирыстоны. Ахуыр кодтой республикон сфæлдыстадон скъолаты, аивадон училищæйы. Ныр сæ экспозицимæ бакæсынмæ æрбацыдысты сæ хистæр æмкусджытæ. Скодтой сын бæрзонд аргъ, загътой, бацархайын ма цæуыл хъæуы, уый дæр.
Дзбойты Михал, УФ-йы сгуыхт нывгæнæг: «Иумæ иу хъуыддаг кæй уарзынц, уый у ахсджиаг. Уый та ууыл дзурæг у, æмæ нæ Ирыстонæн хорз сомбон кæй ис».
6 нывгæнæджы сæ куыстытæ иумæйаг равдысты баиу кодтой фыццаг хатт. Аивадуарзджытæн цымыдисаг экспозици феныны фадат уыдзæн иу мæйы дæргъы.
Хъайтмазты Дзерассæ
