Йæ автор Кокайты Тотрадз ыл фæкуыста цалдæр азы. Нывгæнæг Валерий Григорян дæр йæ курдиат нæ бавгъау кодта, æмæ сæ иумæйаг фæллойæ рауад хуызджын æмæ цымыдисаг чиныг «Абетæ сабитæн».
Фæлтæрдджын ахуыргæнæг Зæнджиаты Розæ йæ хъæбулы хъæбулæн амоны ирон дамгъæтæ. 7 аздзыд Алан æм лæмбынæг байхъусы æмæ йæ нанаимæ раиртасы æмдзæвгæйы мидис, уыимæ йæ цæст атонын нæ комы нывæфтыд сыфтæй. Ног чиныг «Абетæ сабитæн» бинонтæм æрбафтыд цалдæр боны размæ
Зæнджиаты Розæ: «Арс уарзы мыд. Æмæ уый базондзысты сывæллæттæ, арс кæй у хъæддаг сырд, ноджы мыд кæй уарзы уый. Ноджы дæр ма Арсы фырт æрцыдис мыдгæстæм мыд агу рæмæ куы бафсæстис уæд бузныг дæр нæ загъта, фæлæ араст ис йæ фæд, йæ фæд. Ахуыргæнæг, кæнæ хъомылгæнæ зæгъдзæнис, уый кæй у æвзæр миниуæг. Хорздзинадæн зæгъын хъæуы бузныг».
Чиныджы автор, зындгонд поэт Кокайты Тотрадзы бирæ азты тыхсын кодта иу фарста: «Цы у мæ бон саразын ирон æвзаг бахъахъхъæнынæн?», æмæ сбæлвырд кодта, æнæмæнг кæй хъæуы сывæллæттæн хуызджын абеты чиныг рауадзын. Алы дамгъæмæ дæр ныффыста цыппаррæнхъон мидисджын æмдзæвгæ.
Кокайты Тотрадз, поэт: «Сывæллон афтæ куы бакæсы, «Гино кæсы киномæ, мыст нæ тæрсы гинойæ», уæд, æвæццæгæн, алы сывæллоны зæрдæмæ дæр фæцæудзæни. Мæ сыхы сывæллæтты афæлвæрдтон æмæ йæ чыныгмæ гæсгæ дзуырын зонынц. Сывæллæттæн пайдайаг уыдзæн, уый куы нæ зыдтаин, уæд ыл кусгæ дæр нæ бакодтаин».
Нывгæнæг Валерий Григорян сси йе `мцæдисон. Мидисджын æмдзæвгæтæм скодта мидисджын аив нывтæ æмæ сæ иумæйаг фæллойæ рауад «Абетæ сабитæн». Йæ тираж у 1 мин экземпляры.
Республикæйы профцæдисты ахуырады æмæ наукæйы хайады сæрдар Тезиаты Таймураз æй куы федта, уæд дзы сифтонг кодта горæты 2 рæвдауæндоны. Æлхæнынц æй дуканийы дæр.
Абетæ сабитæн рацыдис æрмæстдæр иу мин тиражы, уæй йæ кæнынц «чингуыты дукани»-йы Дзанайы фырты уынджы. Алы ныйарæгмæ дæр цымыдисаг фæкæсдзæн ахæм чиныг йæ кæстæрæн балхæнын.
Чиныг дуканийы тæрхæджыты бирæ нæ лæууы. Æлхæнынц æй ныййарджытæ, стæй рæвдауæндæтты кусджытæ. Чиныгмæ æркаст Дзуджыхъæуы 13-æм скъолайы директор Сæлбиты Иринæ æмæ дзы уый дæр разыйæ баззад.
Сæлбиты Иринæ,13-æм скъолайы директор: «Мæнмæ гæсгæ ацы чиныг рæвдауæндæттæ куы райсой, ирон æвзаг цæмæй ахуыр кæной сывæллæттæ, уæд уыдзæн тынг хорз. Уымæн æмæ дзы алы дамгъæйыл дæр ис æмдзæвгæ, стæй аив нывтæ. Сывæллæтты тынгдæр уый сразæнгард кæндзæни, ахæм рæсугъд нывтæ дзы кæй ис, уый тыххæй».
Бафиппайын хъæуы, цалынмæ бирæтæ, ирон æвзаг сæфы, зæгъгæ, дзурынц, уæдмæ уал Кокайты Тотрадз хъуыддагæй архайы йæ бахъахъхъæныныл. Æмæ дзы стыр хæрзтæм не `нхъæлмæ кæсы. Хуымæтæг «Бузныг»-æн аргъ нæй, зæгъы чиныджы автор.
