Саккаг æй кæнынц 2 азы иу хатт, 35 азы онг кæуыл цæуы, ахæм æрыгон автортæн
Мырыкаты Артемий æмæ Куыдзилты Камиллæ систы Хъамбердиаты Мысосты номыл паддзахадон премийы лауреаттæ литературæйы къабазы. Саккаг æй кæнынц 2 азы иу хатт, 35 азы онг кæуыл цæуы, ахæм æрыгон автортæн. Преми дæттыны кадджын мадзалы республикæйы сæргълæууæг Сергей Меняйло куыд загъта, афтæмæй конкурсмæ цы куыстытæ лæвæрд æрцыдысты, уыдоны æмвæзад ныфс дæтты, национ литературæ дарддæр æнтыстджынæй кæй рæздзæн, æрыгон автортæн та сæ къухы бафтдзæн, бахъахъхъæнын æмæ фæхъæздыгдæр кæнын сæ размæ фæлтæртæ цы бынтæ ныууагътой, уыдон. Бæлвырддæр радзурдзæн Хъайтмазты Дзерассæ.
Сыгъдæг сыфыл цæмæй уацмыс райгуыра, уый суыдзæн, уæлкурдиат кæмæ ис, уыдоны бон. Æмæ ацы хъуыддаджы нæ бахъыгдардзæн фидæны дæсныйад дæр. Кæд ыл бирæ рæстæг хардз кæнын хъæуы, уæддæр. Куыдзилты Камиллæ ахуыр кæны Цæгат Ирыстоны паддзахадон медицинон академийы педиатрион факультеты 3-æм курсы. Фæнды йæ дæсны дохтыр суæвын, æмæ уыимæ литературæйы дунейы дæр фæд ныууадзын. Камиллæ нырма скъолайы райдыдта æмдзæвгæтæ фыссын. Йе сфæлдыстады æвдисы райгуырæн зæхмæ уарзондзинад æмæ зæрдæйы æнкъарæнтæ.
Æмдзæвгæ «Ирыстон – мæ кад мæнæн, мæ зæрдæ» у Камиллæйы фыццаг къахдзæф поэтикон архайды. У Фыдыбæстæмæ æгæрон уарзондзинады тыххæй. Алы рæнхъ дæр фыста сæрмагонд зæрдæйы ахастимæ.
Хъамбердиаты Мысосты сфæлдыстад Камиллæйы кæддæриддæр разæнгард кодта. Поэт бирæ фыста райгуырæн зæхмæ уарзондзинадыл, æмæ сæрмагондæй уымæ гæсгæ йæ номыл литературон конкурсмæ æрыгон автор сфæнд кодта ахæм темæимæ баст æмдзæвгæ рахæссын. Камиллæйæн Хъамбердиаты Мысосты номыл паддзахадон преми саккаг кодтой номинаци «Поэзи»-йы.
2 уарзон хъуыддаджы иуы баиу кæнын æнæхъæн чиныг скæныны нысанимæ бантыст Цæгат Ирыстоны паддзахадон университеты историон факультеты 4-æм курсы студент Мырыкаты Артемийæн. Йæ сабибонтæй уарзта истори æмæ литературæ, æмæ йын йæ хъарутæ историон прозæйы бавзарын стыр бæрнондзинад уыдис.
Мырыкаты Артемийы куыст у Милдзыхты Хыдзымырзæйы цард æмæ сгуыхтдзинадимæ баст. Фыдыбæстæйы Стыр хæсты рæстæг иунæгæй ныппырх кодта знаджы 100 салдатæй фылдæр. Алыхуызон уацтæ, интервьютæ – Артемий æрмæджытæ æмбырд кодта 3 азы онг хъæбатыры фæдон Константин ТропоИдзеимæ. Мылдзыхты Хадзымырзæйы тыххæй зындгонд цаутæ студент æрфыста йæхи уникалон аивадон æвзагыл. Уарзон темæмæ сæрмагонд цымыдисдзинады фæрцы Артемийы къухы бафтыд Хъамбердиаты Мысосты номыл паддзахадон преми номинаци «Прозæ»-йы райсын.
Хъамбердиаты Мысост 22 азы йедтæмæ нæ фæцард. Фæлæ йын уыцы рæстæг фаг уыд, цæмæй йæ адæмы зæрдæты баззайа, уымæн. Преми кæмæн саккаг кодтой, уыцы æрыгон фысджытæ дарддæр ахæццæ кæндзысты поэты хъуыддаг – рæзын кæндзысты национ литературæ, æмæ уыимæ архайдзысты, цы хъæздыг бынтæ ис, уыдон бахъахъхъæныныл.
