Адæмæн куыст дæттыны комитет ныр æххæст кæны дыууæ программæйы – цæрджытæн куысты бынæттæ агурын, стæй ацы къабазы уавæр снывыл кæнынæн уæлæмхасæн мадзæлттæ саразын.
Икъаты Альбинæ хæринаггæнæджы курсытæм ссæуы Дигорайæ. Раздæр уыд дуканигæс. Фæлæ йын ныр бынат нал ис. Адæмæн куыстдæттыны комитетæй йæ рарвыстой ахуыр кæнынмæ.
Икъаты Альбинæ: «Раздæр ахуыр кодтон дуканигæсыл, фæлæ куыст нæй æмæ ныр ардæм æрбацыдтæн, центр занятостийæ мæ æрбарвыстон ахуыр кæнынмæ хæринаггæнæгыл. Алы адæймаджы зæрдæмæ дæр цæуы, адджын хæринаг, стæй йæ рæсугъд куы сæвæрой æмæ куы бахæссой, афтæ».
Ацы къабазы уавæр снывыл кæнынæн «Уæлæмхасæн мадзæлтты программæ»-йы руаджы афæдзы райдайæнæй ахуыр кæнынмæ æрвыст æрцыд 13 адæймаджы – хæринаггæнæг, бухгалтер, уæйгæнæг. Сæ ахуырæн сын бафыста куыстæддæг центр. «Уæлæмхасæн мадзæлтты программæ»-йы руаджы ма арæзт цæуынц æндæр хъуыддæгтæ дæр. Зæгъæм, сæ дæсныйадмæ гæсгæ стажировкæ райсыны фадат ис æрыгон специалисттæн. Мызд сын фиды адæмæн куысдæттыны комитет.
Къаболаты Ларисæ, РЦИ-Аланийы адæмæн куыстдæттыны комитеты сæрдар: «Цы ахуырад райсынц, ахæм бынæттæ сын нæ бон раттын нæу. Ацы прогаммæйы ис иу ахæм мадзæл, æмæ сын нæ бон у 6 мæйы, цавæр ахуырад райсныц, ахæмыл сæ бон у стажировкæ кæнын. Æмæ ма сын фидгæ дæр бакæнæм, мызд цас у, 5 минæй чысыл фылдæр, уый бæрц æмæ сын уыд дæр æххуыс у».
Цæгат Ирыстоны фæсивæдон бизнес-клубы разамонæг Дзодзыккаты Олег куыд зæгъы, афтæмæй ахæм æмгуыстад пайда у.
Дзодзыккаты Олег, РЦИ-Аланийы фæсивæдон бизнес-клубы разамонæг: «Программæ кусы дыууæ азы. Æмæ нæм æрбацыд 10 адæймаджы. Ам сын уыд стажировкæ. Уыдонæй нæм 5 æрыгон специалисты баззадыст кусгæйæ. Махæн дæр уый пайда у, стæй фæсивæдæн дæр».
«Цæрджытæн куысты бынæттæ агурын»-ы программæйы руаджы та æхсæнадон куыстытæм афæдзы райдайæнæй æрвыст æрцыд 20 адæймаджы. Алы мæй дæр сын комит бафиды 850 сомы, фæлæ сæйрагдæр та уый у, æмæ исынц ног зонындзинæдтæ. Гæнæн ис, æмæ сын фæзына куысты бынат дæр. Рæстæгмæйы куыстмæ ма комитет æрвиты, 14 азы кæуыл сæххæст, ахæм æнахъом сывæллæтты дæр. Зæгъæм, психологон диагностикæ æмæ консультациты центр «Æууæнк»-ы ис 4 ахæм кусæджы. Программæтæ сæххæст кæнынæн æхца дихгонд цæуы куыд республикон, афтæ федералон бюджетæй дæр. 2013-æм азы уыдзысты 300 милуанæй фылдæр. Уыдоны хыгъды адæмæн цы социалон мызд фидынц, уый дæр.
2012-æм азы бæрæггæнæнтæм гæсгæ Цæгат Ирыстоны 5 æгуыст адæмагæн ис æрмæстдæр иу куысты бынат. Уый у æппæтуæрæсеон бæрæггæнæнтимæ абаргæйæ бæрзонддæр, зæгъынц адæмæн куыст дæттыны комитеты специалисттæ. Ахæм уавæр ис кавказаг регионты се ппæты дæр.
Программæты руаджы куысты бынæттæ лæвæрд цæудзæн инвалид-адæмæн, стæй бирæсывæллонджын ныййарджытæн. Ахъаз уыдзысты амалхъом адæмæн дæр.
Гугкаты Иринæ
