Архайдта Цæгат Ирыстоны Сæргълæууæджы хæстæ рæстæгмæ æххæстгæнæг Сергей Меняйло
Нæ бæстæйы алы регионты фæсивæды æфсæддон-патриотон хъомылады центртæ саразыныл ныхас кодтой сæрмагонд æмбырды. Амыдта йæ Уæрæсейы хъахъзхъæнынады министр Сергей Шойгу. Æмбырды архайдта Цæгат Ирыстоны Сæргълæууæджы хæстæ рæстæгмæ æххæстгæнæг Сергей Меняйло. Æфсæддон-патриотон центртæ хъуамæ фæзыной æппæт горæтты, æрмæст 100 мин адæймагæй фылдæр кæм цæры, ахæмты. Ахæм уынаффæйы тыххæй фехъусын кодта Уæрæсейы Президент Владимир Путин. Сергей Шойгуйы ныхæстæм гæсгæ, ахæм центртæ æнæмæнг хъæугæ сты. Фыццаг æмбырдтæ уал арæзт æрцыдысты Мæскуыйы æмæ Мæскуыйы облæсты. Алы фæлтæрмæ райстой фæйнæ 600 адæймаджы. Цæгат Ирыстоны фæсивæдон политикæмæ æмæ патриотон хъомыладмæ здахынц стыр æргом. Нæ республикæйы ис 17 мины æмæ 211 æвзонг æфсæддоны. Сæ отрядтæ кусынц æппæт скъолаты, алы районы та арæзт æрцыдысты зоналон центртæ æмæ штабтæ. Уымæй дарддæр алы аз дæр фæкусынц æфсæддон-спортивон лагерь «Балц» æмæ патриотон-барадхъахъхъæнæн фæлтæр «Патриот».