Уæвгæ та ацы къабазы кусджытæн алы бон дæр ацæуы адæмæн баххуыс кæныны нысанимæ
Нæ бæстæйы сбæрæг кодтой социалон кусæджы бон. Уæвгæ та ацы къабазы кусджытæн алы бон дæр ацæуы адæмæн баххуыс кæныны нысанимæ. Цæгат Ирыстоны социалон æххуысæн ис цалдæр дæлхайады. Афтæ, кусджытæ аудынц хистæр кары адæмыл, стæй, йе нæниздзинад хъыгдард кæмæн у, ахæм сывæллæттæн. Социалон кусджытæн сæх æххæстæй сбæттынц сæ дæсныйадимæ.
Елхоты комплексон центры уазджытæ сты дæсны алы хъуыддагмæ дæр. Сцæттæ кæндзысты хъæрмхъуыпп дæр æмæ оливье дæр. Хæринаг кæнын сæ ахуыр кæнынц бынæттон социалон кусджытæ. Альбинæ кардимæ дæсныйæ архайы. Йæ рецептты чиныджы хæринæгты хыгъд чысыл нæу.
Цæлгæнæн, тренажерты зал, фæлладуадзæн зонæ. Ам ис алыхуызон фадæттæ, хи аирхæфсынæн, æмæ æнæниздзинад фæфидардæр кæнынæн. Кусджытæ инвалидтæн æххуыс кæнынц хуымæтæг цардыуагмæ адаптаци кæнын. Фембæлдтытæ сын вæййы къуыри иу хатт.
Хæдзары æххуыс ма у социалон лæггад кæныны иу ахсджиаг хуыз. Республикæйы алы районы дæр ис, адæймаджы узæлд кæй хъæуы, ахæмтæ. Годжысаты Сонетæ йæ цæст дары 14 адæймагмæ. Алкæйыдæр сæ бабæрæг кæны къуыри 2 хатты. Ацы къабазы кусы 25 азы. Бирæтимæ йын ис хæлар ахастдзинæдтæ, уымæ гæсгæ йын фæллой кæнын дæр зын нæу.
Сидзæр сывæллæтты хæдзар-интернат «Ласка»-йы сæрмагонд æргом здахынц, йе нæниздзинад хъыгдард кæмæн у, уыцы сывæллæтты комплексон ахуырадмæ æмæ сын социалон лæггад кæнынмæ. Интернаты куысты сæйраг нысан у, алæкæимæ дæр сæрмагондæй архайын. Пелагогтæ сывæллæтты ахуыр кæнынц хæрын, нуазын, сæ дзаумæттæ кæнын, кæнынц сын медицинон, психологон æмæ социалон æххуыс.
Фæллойы æмæ социалон рæзты министрады хыгъды лæууы 150 мин адæймаджы. Уыдонæн лæггад кæнынц 800 социалон кусæгæй фылдæр.
Социалон кусджытæ, сæ бæрны чи ис, уыдонæн сты ныфс æмæ æххуыс. Сæ зæрдæтæ сын барухс кæнынæн никуы бавгъау кæнынц сæ мидбылхудт æмæ хъарм ныхас.
