Уый ахызт царды зындзинæдты сæрты, баззад æнæ къæхтæй, сахуыр ногæй цæуын, фæлæ йæ зæрдæйы рухс нæ ахуыссыд
Нæ рæстæджы хъайтар… Радихан Азизов ахызт царды зындзинæдты сæрты, баззад æнæ къæхтæй, сахуыр ногæй цæуын, фæлæ йæ зæрдæйы рухс нæ ахуыссыд. Йæ хæлар хъуыддæгты тыххæй æрмæст нæ республикæйы цæрджытæ нæ зонынц. Нæлгоймаджы уды уыйбæрц ныфс æмæ адæмуарзондзинад кæцæй ис, уый тыххæй радзурдзæн Тъехты Элинæ.
Радихан Азизовы зонынц канд Ирыстоны нæ, фæлæ æнæхъæн бæстæйы дæр. Йæ хæлардзинады хъуыддæгтæн нæй кæрон. Ацæргæ адæмæн сæ хæдзары сæр сцалцæг кæнын, бирæсывæллонджын бинонтæн хостæ æмæ хойраг æрбаласын, сæрмагонд æфсæддон операцийы архайджытæн гуманитарон æххуыс арвитын. Уыцы хорздзинæдты хыгъдæн кæрон дæр нæй. Нæлгоймаг йæхæдæг куыд зæгъы, афтæмæй бон иу адæймагæн дæр куы баххуыс кæнай, уæд æй дзæгъæлы нæ арвыстай.
Бюргеры синдром. Ахæм диагноз дохтыртæ Радиханæн сæвæрдтой 10 азы размæ. Ахæм низæй рынчын адæмы буары туг хорз нал фæцæуы. Уый аххосæй нæлгоймаг баззад æнæ къæхтæй. Фæлæ йæ ныфс нæ асаст. Цардмæ уарзондзинады æнкъарæнтæ фæтыхджындæр сты. 2 азы размæ Уæрæсейы Социалон Фонды цæгатирыстойнаг управленийы æххуысы руаджы Радиханæн сарæзтой протезтæ.
Рæстæджы фæстæ Радиханы цур æрбалæууыдысты, йæ хъуыдыимæ разы чи у, ахæм адæм. Ныр иумæ сæмбырд кæнынц фæрæзтæ æмæ сæ арвитынц æххуысхъуаг адæмæн. Цы хцайы фæрæзтæ бахардз кæнынц, уыдоны тыххæй нæлгоймаг радзуры йæ социалон хызты.
Киборг – афтæ йæ хуынджылæгæй хонынц йе мбæлттæ. Радихан арæх æрхъуыды кæны, протезтыл сахуыр кæнын æмæ дзы фыццаг къахдзæвтæ акæнын ын цы зын уыдис, уый. Зæгъæн ис, æмæ цæуын ногæй ахуыр кодта. Æрвылбоны тренировкæтæ æмæ æнæсæтгæ ныфс равдыстой, адæймаджы амондджын суæвын кæй ницы бахъыгдардзæнис, уый. Радихан у нæ рæстæджы хъайтар. У, алы адæймаджы уды цы хæлардзинад æмæ цæстуарзондзинад ис, уыдоны вдисæн.
