Ахæм æххуыс скæнын æмбæлыд цалдæр категорийæн.
Нæ республикæйы 37 мин адæймаджы компенсацийы хуызы райстой æхцайы фæрæзтæ. Ахæм æххуыс скæнын æмбæлыд цалдæр категорийæн. Афтæ 1200 сомы райсдзысты, куыстхъом чи у, фæлæ ацæргæ адæймагмæ, кæнæ та 80 азæй фылдæр кæуыл цæуы, æнæ искæйы æххуысæй кæй бон нæу архайын, стæй 1-æм къæпхæны инвæлидмæ чи кæсы, уыцы адæм. Ардæм нæ хауынц гуырдзæй рахæсгæ рынчынтæ. 18 азы онг инвæлидтæм, кæнæ та сывæллонæй рынчын чи у, уыдонмæ чи зилы, уыцы адæм æрвылмæй хъуамæ исой 10 мин сомы. Фиддонтæ райсынæн пенсион фонды сайтмæ, кæнæ та паддзахадон лæггæдты порталмæ хъæуы курдиат бадæттын. Уый скæнæн ис бирæвæрсыг центрты. Цæгат Ирыстоны ма коронавирусы пандемияйы тыххæй 31 августмæ аргъæвтой, æнæ дарæгæй чи баззад, æмæ æстдæс азы кæуыл сæххæст, уыцы сывæллæттæн фиддонтæ. Уый тыххæй фехъусын кодта пенсион фонды цæгатирыстойнаг хайады разамонæг Таболты Сергей. Августы пенсион фонд кусæг пенсиисджытæн сæ фиддонтæ ногæй банымайдзæн. Уыцы хъуыддаджы æнцой кæндзысты 2019-æм азы фæдзæхстадон фиддонтыл. Æдæппæтæй та нæ республикæйы ис 40 мин кусæг пенсиисæджы.
