Ныр рынчындæтты, скъолаты æмæ рæвдауæндæтты электрон тых куы ахуысса, уæд социалон объекттæ æвæстиатæй баиу кæндзысты резервон фæрæзтæм
Нæ республикæйы æлхæд æрцыдысты электрон тыхы системæйы 3 ног уæлæмхасæн кусæнгарзы.
Ныр рынчындæтты, скъолаты æмæ рæвдауæндæтты электрон тых куы ахуысса, уæд социалон объекттæ æвæстиатæй баиу кæндзысты резервон фæрæзтæм. Уыцы системæтæ уыдзысты паддзахадон унитарон куыстуат «Аланияэнергосеть»-ы бæрны. Алкæйы хъомыс дæр уыдзæн 30 кВт. Кусæнгæрзтæ сты нæ бæстæйы конд. Уымæй дарддæр сты рог архайæн, æмæ системæмæ баиу вæййынц цыбыр рæстæгмæ. Уæвгæ, уæлæмхасæн системæтæ республикæйы цæрджытæн фадат ратдзысты хæрзхъæд электрон тых исынæн. Ивгъуыд аз паддзахадон унитарон куыстуат «Аланияэнергосеть» йæхи инвестицион программæ сæххæст кодта 100 %. Специалисттæ баивтой Дигорайы, Беслæны æмæ Мæздæджы трансформаторон дæлстанцæты 30 сæры. Ахæм куыст объектты нæ цыди дæсгай азты дæргъы. Ацы аз «Аланияэнергосеть» нысан кæны ноджыдæр иу станцæ самал кæнын. Йæ хъомыс уыдзæн 100 кВт.
