Сæрмагонд амынддзинæдтæ сын кæнынц психологон-педагогон æххуысы центры специалисттæ
Нæ республикæйы æнтыстджынæй æххæстгонд цæуы, ныййарджытæн æххуысгæнæг проект. Сæрмагонд амынддзинæдтæ сын кæнынц психологон-педагогон æххуысы центры специалисттæ. Цавæр фарстатимæ йæм æрбацæуынц, уый тыххæй радзурдзæн нæ уацхæссæг Гæджиты Сослан.
Цалынмæ сывæллæттæ алыхуызон хъæзтытæй сæхи ирхæфсынц, уæдмæ сæ ныййарджытæ та консультацитæ исынц психологон-педагогон реабилитацийы æмæ коррекцийы центры специалисттæй. Саппиаты Ларисæ ныридæгæн дæр ацы центрмæ цыди. Йæ сывæллон æййафы зындзинæдтæ, ома дзуры къуылымпытимæ. Чысыл София афæдзы бæрц кусы логопедимæ, æмæ йын ис æнтыстдзинæдтæ.
Центры специалисттæ куыд зæгъынц, афтæмæй ныййарджытæ фæстаг рæстæг сæ цæстæнгас аивтой сывæллоны хъомылады фарстатæм. Уымæ гæсгæ хаст æрцыд уынаффæ, проект саразыны тыххæй. Уый хъуамæ ныййарджытæн иумæйаг æххуыс кæна психологон-педагогон æгъдауæй. Проект грант райста 3 милуан сомæй фылдæр. Уыцы фæрæзтæй нысан кæнынц кусджытæн мызд фидын, стæй компьютертæ æмæ мультимедион кусæнгæрзтæ самал кæнын.
Специалисттимæ консультациты фæстæ ныййарджытæ ногæй æрбацæуынц центрмæ. Уымæн æмæ сæм фарстатæ арæх сæвзæрынц. Арæхдæр бацагурынц логопеды æххуыс. Уæвгæ, алы аипдзинæдтæ сраст гæнæн вæййынц, фæлæ цас раздæр, уыйас хуыздæр.
Тынг тæлфаг сывæллæттæн дæр баххуыс кæнæн вæййы. Æрмæст ныййарджыты хъæуы æмбарын, сабиимæ куыд хуыздæр кусын хъæуы, уый. Специалисттæ сын уый тыххæй кæнынц бæлвырд консультацитæ.
Центры кусджытæ ныййарджытæн æххуыс кæнынц алывæрсыг фарстаты. Суанг скъолайы хи куыд дарын хъæуы, æмæ фæлварæнты размæ куыд не стыхсой, ахæм фарстаты дæр.
Элеонора Меликосьян у психолог. Уый сывæллæттæн æххуыс кæны хи куыд дарын хъæуы рæвдауæндоны æмæ скъолайы дæр.
Лæвар консультацион æххуыс райснынæн ныййарджытæн сæ бон у психологон-педагогон реабилитацийы æмæ коррекцийы центрмæ бадзурын ахæм телефоны номырæй 50-11-40. Ныры онг специалистты æххуыс райстой нæ республикæйы 4 мин ныййарæгæй фылдæр.
