Уыцы фарстатыл дзырдой Оперативон штабы æмбырды
Нæ республикæйы дарддæр æххæст кæнынц карз цæттæдзинады фæтк, æнæниздзинадхъахъхъæнынады системæ та архайы коронавирусы инфекци бауромыныл. Уыцы фарстатыл дзырдой Оперативон штабы æмбырды. Битарты Вячеслав бæрнон адæймæгты бафарста скъолаты æмæ æндæр ахуыргæнæндæтты уавæрæй. Республикæйы сывæллæтты рынчындоны сæйраг дохтыр Икъаты Мурат куыд радзырдта, афтæмæй сабиты æнæниздзинады уавæрмæ ис бæстон цæстдард.
Специалисттæ æрвылбон бæрæг кæнынц рынчынты нымæц скъолаты æмæ рæвдауæндæтты. Ирыстоны фармацийы æмæ медицинон техникæйы куыстуаты разамонæг Гергиты Зæлинæ куыд радзырдта, афтæмæй рынчындæттæ æмæ поликлиникæтæм фæхæццæ кодтой сæрмагонд хостæ. Уымæй уæлдай æрвылбон æххæст кæнынц, æвналæн кæмæ нæй, уыцы хосты æмæ медикаментты æфстауц.
Рынчындæтты сæйраг дохтыртæн бахæс кодтой, цæмæй фæахадгæдæр кæной цæрджыты курдиæттæ æмæ хъæстытимæ куыст. Уæ зæрдыл уын æрлæууын кæндзыстæм – Битарты Вячеславы хæслæвæрдмæ гæсгæ республикæйы сарæзтой колл-центр. Кусынц дзы бархионтæ. Уыдон æрвылбон дзурынц, амбулаторон уагæй чи дзæбæх кæны, уыцы рынчынтæм æмæ сæ фæрсынц, цæмæй тыхсынц, уымæй.
