Нæ фыдæлты æгъдæуттæ æххæст кæнынц алы хæдзары дæр
Нæ республикæйы райдыдта ирон адæмы кадджындæр бæрæгбæттæй иу – Джеоргуыба. Ахæссы æнæхъæн къуыри. Нæ фыдæлты æгъдæуттæ æххæст кæнынц алы хæдзары дæр. Традици баст у, хъæууонхæдзарадон куыстытæ кæронмæ кæй æрхæццæ сты, уыимæ. Алы хæдзар къуырийы иу бон равзары æмæ скæны йæ бæрæгбон. Æрбамбырд кæны сыхæгты æмæ скувынц Хуыцаумæ. Хæдзары фсинтæ бацæттæ кæнынц бæрæгбоны фынг. Уый руаджы Хуыцауæн бузныг фæзæгъынц сæ хъæздыг тыллæджы тыххæй æмæ фæкувынц фидæны азæн. Фидараты Маринæ радзурдзæн бæстондæр.
Сæрмагондæй Джеоргуыбайы бæрæгбонмæ Змейкæйы станицæйы спортивон скъолайы арæзт æрцыд спартакиадæ. Сæ тыхтæ дзы бафæлвæрдтой Кировы районы фæсивæд 5 категорийы – уæгъдибар хъæбысхæстæй, боксæй, дугъы уайынæй, армрестлингæй æмæ уæзæгтæ исынæй. Æвзонг боксер Кусурты Аслан йе мбæлттимæ æрбацыд йæ зонындзинæдтæ равдисынмæ. Спорты ис 3 азы онг, фæлæ йæ абон фæуæлахиз уæвын уæлдай тынгдæр фæнды.
Ерыстæм хуынд æрцыд Цæгат Ирыстоны парламенты сæрдар Тускъаты Таймураз. Куыд бафиппайдта, афтæмæй ахæм мадзæлттæн, спортæй дарддæр, ис культурон нысаниуæг дæр. Уый та рæзгæ фæлтæрæн хорз фадат дæтты нæ рагфыдæлты культурæ, традицитæ æмæ æгъдæуттæ хуыздæр базонынæн.
Змейкæйы стнаицæйы бæрæгбонмæ зæрдиагæй цæттæ кæнынц сæхи. Нæлгоймæгтæ рагацау æрæмбырд сты дзуары бын. Уым скодтой кусарт æмæ скуывтой хуыцаумæ.
Джеоргуыба Ирыстоны цæрджытæн у уæлдай кадджындæр бæрæгбон. Баст у фæззыгон бæркад бафснайыны рæстæгимæ. Бæрæгбоны фынгтыл æртыгай кæрдзынтæ, æртæ фæрсчы, нæртон бæгæны.
Æгъдаумæ гæсгæ бæркадджын фынгмæ æрбахонынц хъæуы цæрджыты. Хистæртæ скувынц Хуыцаумæ æмæ нæлгоймæгтыл аудæг Лæгты дзуармæ. Уый фæстæ къуырийы дæргъы Ирыстоны алы бинонтæ дæр бæрæг кæндзысты сæ хæдзæртты. Бæрæгбон фæуыдзæн иннæ къуырисæры. Уыцы мгъуыдмæ кувæг адæм уæларвон тыхтæй курдзысты, æнæниздзинад, фарн, амонд æмæ, кæй зæгъын æй хъæуы, дунейы сабырдзинад.
