Æрвылазон традицимæ гæсгæ бæрæгбоны мадзæлттæ райдыдтой Ирон аргъуаны кæртæй
Нæ республикæйы сбæрæг кодтой ирон æвзаг æмæ литературæйы бон. Æрвылазон традицимæ гæсгæ бæрæгбоны мадзæлттæ райдыдтой Ирон аргъуаны кæртæй. Уым дидинджытæ сæвæрдтой Хетæгкаты Къостайы æмæ Абайты Васойы цыртдзæвæнтыл. Мадзалы архайдтой Цæгат Ирыстоны Сæргълæууæджы хæстæ рæстæгмæ æххæстгæнæг Сергей Меняйло, Парламенты сæрдар Алексей Мачнев æмæ Хицауады Сæрдары хæстæ æххæстгæнæг Тускъаты Таймураз. Республикæйы разамонæг ма бабæрæг кодта Алайнаг гимназ дæр. Аныхас кодта йæ ахуыргæнинæгтимæ, директоримæ стæй ахуырады министримæ. Ацы бон хуымæтæджы нæ равзæрстой бæрæгбонæн. 15-æм майы 1899-æм азы рухс федта Къостайы мæдзæвгæты æмбырдгонд «Ирон фæндыр». Уымæ гæсгæ 2003-æм азы ацы цауы номыл бындур æвæрд æрцыд ирон æвзаг æмæ литературæйы бонæн.
