Ныртæккæ уымæн аразынц æппæт æмбæлгæ уавæртæ
Нæ республикæйы стыр æргом здахынц мидтуризмы рæзтмæ. Ныртæккæ уымæн аразынц æппæт æмбæлгæ уавæртæ. Уыимæ куыд бынæттон цæрджытæн, афтæ сыхаг регионты æмæ фæсарæйнаг бæстæты минæвæрттæн дæр. Цæмæй сæ ис бафтауæн дисы, уый тыххæй радзурдзæн Фидараты Маринæ.
Ирон адæмы рагон национ инструмент саразыныл Илаты Тимур афæдзæй фылдæр схардз кодта. Æрыгон зарæггæнæгæн ма йæхи къухтæй конд æрмадзы ис æндæр рагон инструменттæ дæр. Ам фенæн ис, нæ фыдæлтæ кæмæй пайда кодтой, ахæм æлыгæй конд мигæнæнтæ, стæй къонайы рæхыс. Тимур йæхæдæг куыд зæгъы, афтæмæй цымыдисаг дзаумæттæ æмбырд кодта бирæ азты. Иуæй-иутæ йын йе мбæлттæ балæвар кодтой, иннæтæ йæхæдæг самал кодта. Цæуылдæрты та æнусæй фылдæр цæуы.
Тимуры æрмадз æрбынат кодта Дæргъæвсы. Ам йæ хæдзары арæх æрлæууынц туристтæ. Тимур сыл рæдауæй сæмбæлы. Радзуры сын ирон адæмы культурæ æмæ традициты тыххæй.
Илаты Тимур фæнд кæны йе рмадз фæуæрæхдæр кæнын. Нырма уал ын скодта бындур. Фæстæдæр та ацы бынаты фæзындзæн дурæй амад бæстыхай. Кæны алцыдæр, цæмæй туристтæн сæ бон уа ам æхсæвы дæр баззайын, стæй ма сæ ахуыр кæндзæн хъæддæсныйадыл. Уый фæрцы сын фадат уыдзæн сæхи къухтæй сувениртæ аразынæн.
Багдавадиты бинонтæ та цæрынц Санкт-Петербурджы. Сфæнд кодтой сæ отпуск Цъæйы арвитын. Æмæ ацы уынаффæйыл нæ фæфæсмон кодтой. Цæгатирыстойнаг æрдз сæ дисы бафтыдта. Ам ис алцыдæр, цæмæй цымыдисæй æмæ пайдаимæ сæ рæстæг арвитой, уый тыххæй. Райдай бæхтыл тезгъойæ æмæ экскурситæй фæуы.
Цъæйы фæлладуадзæн базæтæ уарзон бынæттæ сты уæрæсейаг æмæ фæсарæйнаг туристтæн. Ирина Кароева Ирыстонмæ ссыди Санкт-Петербургæй. Æрыгон чызг алы аз дæр йæ отпуск фервиты хæхты, æмæ алы хатт вæййы йе мбæлттимæ.
Ацы аз туристты регистрацигæнæн фæтк аивта. Кæй зæгъын æй хъæуы, уый баст у пандемияйы уавæртимæ. Базæты бæлццæттыл æмбæлынц тæвдбарæнимæ, маскæтимæ æмæ æрмкъухтимæ.
Турбазæты хицæуттæ куыд зæгъынц, афтæмæй арæнтæ æхгæд кæй сты, уымæ гæсгæ туристтæ сæхицæн бынæттæ ахсын рагацау райдыдтой.
Нæ республикæйы бирæ туристон базæтыл æмæ альплагерьтыл дыууын азтæй фылдæр цæуы. Уый нæ хынцгæйæ, сæ хицæуттæ архайынц рæстæгимæ æмдзу кæныныл. Æмæ фæлладуадзджытæн аразынц æппæт æмбæлгæ уавæртæ.
Нæ рæсугъд æрдз сарæзта иттæг хорз уавæртæ, фæлæ ма хъæуы, цæмæй адæм дæр бацархайой уыцы хъуыддагыл, зæгъынц туристтæ. Нæзы бæлæсты хсæн тезгъо æмæ экскурситæ дисы фтауынц сæ ппæты дæр. Фæлæ ахсджиаг у иннæ фарста. Ацы ран амонæнтæ кæй нæй, уымæ гæсгæ æнцон у фæдзæгъæл уæвын. Туристтæ разы не сты, территорийы информацион стендтæ фаг кæй нæй, уыимæ.
