Ацы аз социалон контракттæ бафыссæн уыдзæн 1 мин æмæ 200 адæймагæй фылдæрæн
Нæ республикæйы цæрджытæн 3 азæй фылдæр æххуыс кæнынц паддзахадон программæмæ гæсгæ. Ацы аз социалон контракттæ бафыссæн уыдзæн 1 мин æмæ 200 адæймагæй фылдæрæн. Ахæм æххуысы руаджы алкæмæн дæр фадат уыдзæн хи бизнес бакæнын. Ацы аз фæрæзтæ фæфылдæр кодтой æмæ ныр уыдзысты 350 мин сомы. Социалон контракттæ адæмæн куыд фæахъаз сты, уый тыххæй радзурдзæн Тъехты Элинæ.
Сырдты цармæй аивгæнæнтæ кæнын у нæ фыдæлты рагондæр куыстытæй иу. Уыцы куыст сног кæнын сфæнд кодта Илья СтукАлов. 5 азы размæ райдыдта цармæй декоративон æмæ цардыуагон фæрæзтæ аразын. Фыццаг ын уыдысты гыццыл цæнгдарæнтæ, фæлæ ныр йæ куыстуаты ис эксклюзивон аивгæнæнтæ. Фарон Илья райста паддзахадæй социалон æххуыс. 350 мин сомæй балхæдта царм æмæ хъæды куыстгæнæн ног кусæнгарз.
Уарзон куыстæй бизнес саразын бантыст Нартыхты Гурамæн дæр. Хъæддæсныйады архайы 30 азы. Райста социалон контракт æмæ адарддæр кодта йæ фыды дæсныйад. Фидæны Гурам фæнд кæны йæ куыстуат фестырдæр кæнын.
Нартыхты Гурам, хъæддæсны: «Паддзахадон æххуыс райстон фарон. Дыууæ мæймæ мын хца æрбацыдысты. Балхæдтон хъæугæ æрмæг æмæ сæ пайда кæнын».
Харебаты Кетеваны фыццаг бизнес пандемияйы рæстæг æрлæууыд. Зын экономикон рæстæг фæхауд йæ куыстæй. Ног куыстуат байгом кодта социалон æххуысы руаджы. Сарæзта бизнес – план æмæ йын ныр ис йæхи хуыйæн æрмадз.
Цæгат Ирыстоны паддзахадон программæ социалон æххуыс кæны 3 азæй фылдæр. Социалон контракт бафысгæйæ адæймагæн баххуыс кæндзысты куыст ссарынмæ, кæнæ хи бизнес байгом кæнынмæ.
Социалон контракты бындурыл паддзахадон социалон æххуыс у цалдæр ведомствæйы куыст. Сæ сæргъы – республикæйы фæллойы æмæ социалон райрæзты министрад.
