Ахæм курдиатимæ бынæттон цæрджытæ æрбацыдысты республикæйы Хицауады Сæрдармæ
Нартыхъæуы, Рассветы æмæ Фыййаджыбылы участоктыл кусæг терапевтæн хъæуы транспорт самал кæнын. Ахæм курдиатимæ бынæттон цæрджытæ æрбацыдысты республикæйы Хицауады Сæрдармæ. Æппæт 3 хъæуы цæрджытæн дæр лæггад кæны иунæг специалист. Цы машинæ сæм ис, уый у тынг зæронд æмæ æппынæдзух асæтты. Дохтыры бахъæуы адæмы курын, цæмæй йæ пациентмæ баласой, уый. Æнæниздзинадхъахъхъæнынады министр Тебиаты Сосланы ныхæстæм гæсгæ, ног машинæ сын ратдзысты хæстæгдæр рæстæг. Цæрджытимæ фембæлды рæстæг ма ныхас цыд, социалон ахадындзинад кæмæн ис, уыцы объектты цалцæгыл æмæ арæзтадыл. Адæм курынц фæндæгтæ æмæ скъолатæ сцалцæг кæнын, стæй районты сыгъдæггæнæн кусæнгæрзтæ рацаразын. Дзæуджыхъæуы цæрæг Хетæгкаты Хетæг Дзанайты Барисæй ракуырдта, цæмæй, Колыты Аксойы номыл сквермæ базилыны рæстæг стыр æргом здæхт æрцæуа цъæх фæлысты куыстытæм. Уымæн æмæ, йæ ныхæстæм гæсгæ, бирæ æнусон бæлæстæ сты æрдзон хæзнатыл нымад. Уæдæ республикæйы цæрджытæ куырдтой сæхи бинонты фарстатæ алыг кæнын дæр. Зæгъæм, материалон æххуыс медицицнон лæггæдтæн, цæрæнуæтты-коммуналон фарстатæ æмæ афтæ дарддæр. Кæронбæттæны Премьер министрты æмæ ведомствоты разамонджыты зæрдыл æрлæууын кодта, куыд ахсджиаг у цæрджытимæ æнгом æмгуыстад кæнын, уый.
