Адæмы размæ дзы хаст æрцыдысты Ирыстоны национ хæзнатæ
Национ иртæстыты центр Курчатовы номыл институты Мæскуыйы арæзт æрцыдысты Цæгат Ирыстоны бонтæ. Адæмы размæ дзы хаст æрцыдысты Ирыстоны национ хæзнатæ. Лæмбынæгдæр хабæрттæ базондзыстут Сосранты Жаннæйы сюжетæй.
Ирондзинадæй хъæздыг рæстæг. Цымæ искуы исчи æнхъæл уыд æмæ Национ иртæстыты центр Курчатовы номыл институты ахæм стыр мадзал арæзт æрцæудзæн, уый. Цымыдисаг культурон æмæ наукон хъуыддæгтæй æххæст программæ. Архайдтой дзы республикæйы сæргълæууæг Сергей Меняйло, национ иртæстыты центры президент Михаил Ковальчук, директор Хъамболты Марат æмæ æндæр бæрнон адæм.
Бацæттæ æй кодтой Цæгат Ирыстоны æмæ институты æмгустады фæлгæты. Баст уыд Ирыстон Уæрæсеимæ баиу кæныны 250 азы, æмæ автономон республикæйæн бындур сæвæрыны 100 азимæ. Национ иртæстыты центры минæвæрттæ Цæгат Ирыстоны Сæргълæууæджы схорзæхджын кодтой уæлдæр наукон хæрзиуæг – Курчатовы номыл 1-аг къæпхæны сыгъзæрин майданæй.
Сергей Меняйло йæ раныхасы куыд загъта, афтæмæй Курчатовы институт у бæстæйы раззагдæр наукон центртæй иу, йемæ æмгуыстад Цæгат Ирыстонæн дæтты бирæ гæнæнтæ. Уæлдæр ахуыргæнæндæттæн фадат ратдзæн сæ профессионалон æмвæзад фæуæлдæр кæнынæн. Ныры онг республикæйы байгом Курчатовы номыл кълæстæ, сæ фæрцы æнтыстджынæй скъолаты кæнынц профориентацион куыст. Сергей Меняйло арфæ ракодта институты разамындæн нæ республикæйы æнусон истори, хъæбатыр адæмы, культурæ, нæ традицитæ æмæ æгъдæутты тыххæй радзурыны фадат кæй ис, уый тыххæй.
Ирыстоны æрмдæснытæ цы дæсныйадæвдисæг ахуыртæ сарæзтой фæзты, уыдон та дисы бафтыдтой Мæскуйыйаг скъоладзауты.
Националон иртæстыты центр Курчатовы номыл институты директор Хъамболты Мараты та бафæндыди, æрмдæсны Тауаситы Кимы куыстытæ фенгæйæ, йемæ бæстондæр аныхас кæнын.
Афтæмæй ахицæн сты Ирыстоны бонтæ Мæскуыйы Националон иртæстыты центр Курчатовы номыл институты. Мадзалы иу бон иннæмæй цымыдиссагдæр кæй уыд, уый та иу æмæ дыууæ хатты нæ фæбæрæг кодтой йæ уазджытæ.
