Экспозици автор схуыдта «Дом, в котором я живу…»
Национ музейы байгом Уæрæсейы сгуыхт нывгæнæг Абысалты Юрийы куыстыты равдыст. Экспозици автор схуыдта «Дом, в котором я живу…». Абысалты Юрий у регионалон, æппæтуæрæсеон æмæ фæсарæйнаг равдыстыты архайæг. Ныры онг йæ куыстыты равдыстытæ ацыдысты Францийы, Америкæйы Иугонд Штатты æмæ Швейцарийы. Чехойты Фатимæйæн ныхасы бар.
Абысалты Юрийы æвзаг дисы *фтауы. Символикон, интеллектуалон æмæ бирæхайон – уыимæ ирониимæ, фæлæ æнцонæмбарæн. Йæ куыстыты баиу сты ирон адæмы ивгъуыды æмæ нырыккон царды нывтæ, библийы сюжеттæ. Равдыст «Дом, в котором я живу» фенæн ис 40 куысты. Алкæцыйы дæр нывгæнæг равдыста йæ зæрдæйы *нкъарæнтæ.
Равдыст байгом кæныны мадзалмæ хуынд æрцыдысты Уæрæсейы нывгæнджыты Цæдисы уæнгтæ, культурæйы къабазы кусджытæ, Хицауады минæвæрттæ, Абысалты Юрийæн йæ курдиатæн стыр аргъ чи кæны, уыдон.
Нывгæнæджы куыстытæ сты зæрдæмæдзæугæ. Абысалты Юрийы сæрмагонд равдыст чи бабæрæг кодта, уыцы адæмæн сæ миддуне, æнæмæнг, фæхъæздыг.
Абысалты Юрийы куыстытæ фенынмæ æрбацыдысты йæ хæстæджытæ дæр. Йæ чызджы чызг Дзугаты Аидæ вæййы йæ уарзон хистæры алы равдысты дæр. Уый ныхæстæм гæсгæ, йæ мады фыды фыст нывтæ йын æппынæдзухдæр хæссынц æхсызгондзинад.
Равдыст «Дом, в котором я живу» нывæфтыд у, алы адæймаджы зæрдæйы цы сæйраг æнкарæн сæвзæры, уымæй. Уарзондзинады фæд ис йæ куыстыты фылдæр хайы, уымæ гæсгæ равдыст адæмы зæрдæтæм фæндаг æнæ ссаргæ нæ фæуыдзæн.
