Æрдзырдтой дзы сылгоймаджы ахадындзинадыл ног фæлтæр хъомылгæнгæйæ
Национ наукон библиотекæйы арæзт æрцыд алы диныл хæст адæмы конференци. Æрдзырдтой дзы сылгоймаджы ахадындзинадыл ног фæлтæр хъомылгæнгæйæ. Мадзалы архайдтой 100 адæймаджы. Бакодтой йæ республикæйы муфтий Гуæцæлты Хадзымурат стæй Дзæуджыхъæуккаг æмæ Алайнаг епархийы алчыр Герасим. Конференцийы фыццаг хайы æрдзырдтой ирон-алайнаг сылгоймæгты этнокультурон æмæ чырыстон идеалтыл, зæрдæты иудзинадыл, мадæлтæ сæ сывæллæттимæ интернеты тыххæй куыд фæныхас кæнынц, рæзгæ фæлтæры хæзнатыл æмæ суинаг фæлтæр нырыккон æхсæнады йæхи куыд дары, ууыл дæр. Конференцийы дыккаг хайы та цыд бæстон æмæ ргом ныхас. Алчидæр дзы радзырдта йæ фæндон. Зæгъæм, Коцойты Оланнæйы хъуыдымæ гæсгæ, сывæллон хъомылгæнæгæйæ сæйрагдæр у хи дæнцæг æвдисын.
Коцойты Оланнæ: «Алы бон дæр лæвæрд у Хуыцауæй æмæ йын хъуамæ бузныг зæгъæм, абон кæй фембæлдыстæм, уый тыххæй. Мæнмæ афтæ кæсы, æмæ вхæм мадзæлттæ кæнын ахсджиаг у, уымæн æмæ кæрæдзийы фенæм æмæ æрныхас кæнæм нæ сæйрагдæр фарстатыл. Зæххыл æвзæр хъæбултæ нæй. Ныййарæг хъуамæ йæ сывæллонæн радта ныфс æмæ царды цы зонындзинæдтæ хъæуыц, уыдон. Ирон æгъдауыл цы бинонтæ хæст сты, уыдоны сывæллæттæ нæ фæрæдийдзысты».
