Экспозицимæ хаст æрцыдысты 60 аивадон уацмысæй фылдæр
Национ наукон библиотекæйы байгом Санкт-Петербурджы нывгæнджыты равдыст. Экспозицимæ хаст æрцыдысты 60 аивадон уацмысæй фылдæр. Конд сты алы жанрты: нывкæнынад æмæ графикæйы. Ам ма зæгъын хъæуы уый дæр, æмæ се ппæт дæр конд æрцыдысты 20-æм æнусы кæрон. Уыцы рæстæг аивад зынгæ ивддзинæдтæ бафæрæзта. Фыццаджыдæр ацы къабаз сног ис. Нывкæнынад сси æргомдæр, ирддæр æмæ, куыд фæзæгъынц, сæрибардæр. Ацы равдыст та фадат дæтты уыцы-иу рæстæг алы жанрты кусæг нывгæнджытимæ базонгæ уæвынæн. Се сфæлдыстад дзы раргом кодтой нæ бæстæйы цæгатаг сæйраг горæты реалисттæ, абстракционисттæ, экспрессионисттæ æмæ символисттæ. Фæлæ сæ иу кæны бæрзонд профессионалон зонындзинæдтæ æмæ стыр курдиат. Уыдоны фæрцы равдыст рауад ирд æмæ цымыдисаг.
