Йæ куыстытæ йæм бахаста нывгæнæг-колорист Биганты Зæринæ
Национ наукон библиотекæйы байгом «Вернисаж». Йæ куыстытæ йæм бахаста нывгæнæг-колорист Биганты Зæринæ. Æдæппæтæй 40 нывы, æмæ дзы алкæцыйы дæр бæрæг дары авторы æрмдзæф. Биганты Зæринæ у Цæгат Ирыстоны паддзахадон университеты аивæдты факультеты нывкæнынады хайады фыццаг рауагъдонтæй иу. Ацы дæсныйады бындуртыл æй ахуыр кодтой Бедойты Шалва, Челæхсаты Магрез æмæ Басаты Олег. Ныртæккæ та Зæринæ у паддзахадон университеты аивæдты факультеты нывкæнынады кафедрæйы доцент, Цæгат Ирыстоны нывгæнджыты Цæдисы уæнг. Критиктæ куыд зæгъынц, афтæмæй Биганты Зæринæйы сфæлдыстадон хъомыс у æгæрон. Нывгæнæг кусы декоративон нывкæнынады æмæ егъау сфæлдыстады къабæзты. Йæ иуæй-иу нывтæ та конд сты абстрактон æмæ экспрессионистон хуызты. Равдыст «Вернисаж»-ы ма фенæн ис натюрморттæ æмæ пейзажтæ. Зæринæйы куыстытæ схонæн ис куыд нывгæнæджы боныг, афтæ. Ирдæй дзы вдисы йе нкъарæнтæ æмæ миддунейы миниуджытæ. Йæ нывтæ бирæ хæттыты архайдтой Ирыстоны æмæ æндæр регионты равдыстыты.
