Хатдзæгтæ скодтой организацийы архайдæн, снысан кодтой ног хæстæ, æмæ равзæрстой Цæдисы разамонæджы
Национ наукон библиотекæйы уыд Цæгат Ирыстоны журналистты Цæдисы 2-аг Съезд. Хатдзæгтæ скодтой организацийы архайдæн, снысан кодтой ног хæстæ, æмæ равзæрстой Цæдисы разамонæджы. Мадзалы ма къабазы минæвæрттæн саккаг кодтой хæрзиуджытæ, Цæдисы ног уæнгтæ та райстой æвдисæндартæ. Бæстондæр радзурдзæн Хъайтмазты Дзерассæ.
Цæгат Ирыстоны журналистты Цæдисы 2-аг Съезды боны фæткы сæйраг фарста – равзарын, нырыккон дзыллон информацийы фæрæзты куыст хорз чи æмбары, ахæм разамонæджы. Делегаттæ уыдысты иузæрдион. Организацийы сæрдарæй та ногæй равзæрстой паддзахадон телерадиокомпани «Алани»-йы директор Хъуысаты Тимуры. Йæ ног æмгъуыд райдыдта ахсджиаг хъæппæрисæй – нысангонд æрцыд преми «Афæдзы журналист». Профессионалон конкурс арæзт уыдзæн цалдæр номинацимæ гæсгæ.
Цæдисы архайды сæйрагдæр хатдзæгтæй иу у, æрвылазон преми «Рухстауæг» нысангонд кæй æрцыд, уый. Фыццаг лауреаттæ систы Уæрæсейы сгуыхт ахуыргæнæг Биазырты Валентинæ, агентад «Ир-информ»-ы бындурæвæрæг Таболты Иринæ æмæ газет «Моздокский вестник»-ы сæйраг редактор Сергей Телевной. Регионалон хайады ахадгæ куысты тыххæй загъта Уæрæсейы журналистты Цæдисы сæрдар Владимир Соловьев.
Дзырдæн цы тых ис, æмæ профессионалон бæрнондзинады тыххæй сæ хъуыдытæ загътой уазджытæ дæр. Фæнысан кодтой, дзыллон информацийы фæрæзтæ ахсджиаг бынат кæй ахсынц, уый.
Цæгат Ирыстоны журналистты Цæдисы 2-аг съезды снысан кодтой ног уагæвæрд, разамынды æмæ ревизион къамисы хыгъд. Организацийы сæрдары хæдивæгæй æвзæрст æрцыд телерадиокомпани «Алани»-йы информацион службæйы хицау Къæбысты Каринæ. Съезды ма саккаг кодтой Уæрæсейы журналистты Цæдисы уæлдæр хæрзиуджытæ, кады гæххæттытæ æмæ дипломтæ.
Хуымæтæг дзуапдæттæн конференци нæ. Иу фæзы баиу сты къабазы хистæр минæвæртты фæлтæрддзинад æмæ æрыгæтты энерги. Ацы аз Цæдисы рæнхъытæ баххæст кодтой 27 адæймаджы. Æдæппæтæй та организацийы ис 200 журналистæй фылдæр.
Ацы съезды сæйраг хатдзæг сси – рæстæгимæ æмдзу кæнын æмæ бæстæйы медиакъабазы райрæзтмæ æвæрæн хæссын.
