Уыцы фарстатыл æрдзырдтой, Дзанайты Барисы разамындæй Елхоты цы æмбырд ацыд, уым
Национ проекттæ æххæст кæныны тыххæй Кировы районæн радих кæндзысты 400 милуан сомæй фылдæр. Уыцы фарстатыл æрдзырдтой, Дзанайты Барисы разамындæй Елхоты цы æмбырд ацыд, уым. Профилон министртæ æркасты, проекттæм гæсгæ цы куыстытæ бакодтой, уымæ, стæй æрдзырдтой дарддæры фæндтыл. Æмбырды темæтæ уыдысты алыхуызон – æнæниздзинадхъахъхъæнынад, хостæй ифтонгдзинад, бæстыхæйтты цалцæг æмæ афтæ дарддæр. Цавæр хатдзæгтæ рахастой, уый тыххæй радзурдзæн Тъехты Элинæ.
Кировы районы социалон – экономикон райрæзтыл æрдзырдтой, Елхоты цы æмбырд сарæзтой, уым. Фарон районæн рахай кодтой иу миллиард сомæй фылдæр. Срæсугъд дзы кодтой 4 æхсæнадон фæзы, 2 скъолайы та сарæзтой бындурон цалцæг.
Æмбырды размæ министртæ æмæ комитетты разамонджытæ бабæрæг кодтой профилон бæстыхæйттæ. Змейкæйы скъола бындурон цалцæг кæнынц бынæттон цæрджыты бригад. Куыстытæ куыд цæуынц, уымæ æркаст нæ республикæйы арæзтады министр Моргуаты Константин. Ныридæгæн архайынц бæстыхайы сæрыл. Дарддæр бавналдзысты коммуникацитæм. Комсомольскæйы скъолайыл та цæуы 20 азæй фылдæр. Ам дæр цæуынц цалцæггæнæн куыстытæ. Скъола йæ ахуырдзауты суазæг кæндзæн сентябры.
«Уæрæсейы цæрджыты æнцонвадат цæрæнуæттæй æмæ коммуникацион лæггæдтæй сифтонг кæныны» программæмæ гæсгæ Змейкæйы цалцæг кæнынц доны хæтæлтæ. Проекты аргъ – 180 милуан сомы. Аивын фæнд кæнынц хæтæлты 40 километрæй фылдæр. Уыдонæй 10 километры ныридæгæн сты цæттæ. Уыцы иу рæстæг 6 уынджы кусынц 6 экскаваторы.
Елхоты социалон лæггæдты комплексон центры хыгъды лæууынц 540 бинонтæй фылдæр. Уыдонæй 300 сты бирæсывæллонджын. Сывæллæтты психологон фæллад сисыны тыххæй ис сæрмагонд куысты хуызтæ. Се нæниздзинад хъыгдард кæмæн у, уыцы адæмы та сæрмагонд уаты ахуыр кæнынц æрвылбоны фæрæзтимæ архайын. Зæгъæм, нæлгоймаг ахуыр кæны хæринаг кæнын.
Елхоты рынчындоны цалцæггæнæн куыстытæ фесты æрæджы. Аргъ сын скодтой республикон министртæ. Бæстыхайы ис æнæмæнг хъæугæ кусæнгæрзтæ дæр.
Елхоты бирæпрофилон колледжы ног æрмадзтæ фæзындысты, национ проект «Ахуырад» æххæст кæнгæйæ. Ныр дзы студенттæ канд хæринаг кæнын нæ ахуыр кæндзысты. Колледжæн ис, мæнæу кæм байтауой, ахæм зæххытæ. Къæбæр дæр кæнынц, сæхæдæг цы мæнæу æркæрдынц, уыцы ссадæй.
Æмбырды æрдзырдтой æрмæст районы цы куыстытæ кæнынц уыдоныл нæ, фæлæ ма дзы цы лыггæнинаг фарстатæ ис, уыдоныл дæр. Дзанайты Барис бабар кодта æркæсын афтекты уавæрмæ, цæмæй æппынæдзух хостæй ифтонг уой, уый тыххæй. Уымæй дарддæр бабар кодта Елхоты æмæ Змейкæйы рæвдауæндæтты цалцæггæнæн куыстыты фарстамæ æркæсын, стæй бацæттæ кæнын Змейкæйы æмæ Кæрдзыны культурæйы хæдзæртты цалцæджы тыххæй кæмæ цы хъуыдытæ ис, уыдон.
