Музыкалон фембæлды программæ сарæзтой историмæ экскурсийы хуызы. Ацы аз оркестрыл æххæст кæны 5 азы. Репитицийы размæ Ходы Олег се `ппæт музыканттæн дæр сæ инструменттæм базилы.
Хуыгаты Олег адæмон инструментты оркестры цæгъды дала-фæндырæй, йæ сæйраг специализаци кæд ирон фæндыр у, уæддæр. Куыд зæгъы, афтæмæй йын ацы къорды архайын бæрнон у. Фæзынд ын ног хæлæрттæ, сæйрагдæр та йын у, ам сфæлдыстадон райрæзтæн фадæттæ кæй ис, уый.
Хуыгаты Олег, паддзахадон филармонийы ирон адæмон инструментты оркестры музыкант: «Æз ацы коллективы базонгæ дæн бирæ зындгонд музыканттимæ. Ирыстонæн уарзон адæмимæ – Хадыхъаты Аллæимæ, Дауыраты Эдикимæ. Махимæ кусынц, æмæ махæн, фæсивæдæн, уый тынг æхсызгон у».
Оркестры разамонæг æмæ дирижер Ходы Олег куыд зæгъы, афтæмæй, цæмæй ацы аивады стыр бæрзæндтæм схизай, уый тыххæй хъæуы фидар бындур. Уымæн та республикæйы фаг фадæттæ нæй – рагон ирон инструменттыл цæгъдын ахуыр кæнынц аивæдты лицейы, уый дæр куыд уæлæмхасæн уроктæ, афтæ. Йæ хъуыдымæ гæсгæ хъæуы ирон адæмон инструментты скъола байгом кæнын. Абон оркестры архайы 22 адæймаджы. Сæ фылдæр цæгъдын ам сахуыр сты.
Ходы Олег, паддзахадон филармонийы ирон адæмон инструментты оркестры аивадон разамонæг æмæ дирижер: «Сæ фылдæр æмбис сты фæндырдзæгъдджытæ. Фæлæ уæддæр сæ уарзондзинад адæмон инструменттæм æвдисынц сæ цагъдæй. Куы сæ æмбырд кодтой, уæд тыхстысты, кæй нæ базондзысты. Æз сын загътон: «Сахуыр кæндзыстæм, иумæ рæздзыстæм, истытæ æвдисдзыстæм».
Фæлæ зындзинæдтæй ацы къорд нæ тæрсы. 5 азы йе сфæлдыстадæй буц кæны республикæйы аивадуарзджыты. Ныр дæр та сын уыд сфæлдыстадон фембæлд национ наукон библиотекæйы.
Гасанты Валерий: «Фæсивæд ирон адæмон культурæ куыд уарзынц, уымæ гæсгæ ацы коллективæн аргъ нæй. Мæнмæ гæсгæ не сфæлдыстадон интеллигенцийы хæс у сæ фарсмæ æрбалæууын. Уыдонæн сæ бон цы у, афтæ архайынц, цæмæй ирон культурæ ма фесæфа, уый тыххæй».
«Ханты цагъд», «Фæсивæды кафт», «Бирæгъзæнггаг хонгæ». Аивадон къорд ацагъдта 8 композицийы. Музыкалон изæры программæ арæзт æрцыд оркестры историмæ экскурсийы хуызы.
Ныртæккæ музыканттæ цæттæ кæнынц сæ фыццаг юбилей сбæрæг кæнынмæ. Концерт уыдзæн октябры. Ахæм хуызы къорд скæндзæн сфæлдыстадон хатдзæгтæ 5 азы архайдæн. Программæйы уыдзысты зындгонд адæмон мелодитæ æмæ уарзон ирон композиторты уацмыстæ.
Хъайтмазты Дзерассæ
