Дохтыртæ ныртæккæ кусынц республикæйы сывæллæтты клиникон рынчындоны
Николай Бочковы номыл медицинон-генетикон наукон центры специалисттæ ссыдысты Цæгат Ирыстонмæ. Дохтыртæ ныртæккæ кусынц республикæйы сывæллæтты клиникон рынчындоны. Дæсæм февралмæ специалисттæ кæсдзысты сывæллæттæм æмæ сын дæтдзысты лæвар консультацитæ. Дохтыртæ кусынц генетикон низтимæ, æххуыс кæнынц раст диагноз сæвæрын æмæ бæлвырд дзæбæхгæнæн мадзæлттæ рафыссын. Æдæппæтæй специалисттæ фендзысты 6 сæдæ сывæллоны. Афæдзы райдианæй фæуæрæхдæр, центры специалисттæ цы иртæстытæ аразынц, уыдоны номхыгъд. Иу тесты фæрцы уыдзæнис базонын æртын æхсæз низы миниуæджы. Низæй кæуыл фæгуырысхо уой, уыцы сывæллæтты арвитдзысты профилон медицинон куыстуæттæм. Уæ зæрдыл уын æрлæууын кæндзыстæм – медицинон-генетикон центр нæ республикæйы æнæниздзинадхъахъхъæнынады министрадимæ бадзырд бафыста æхсæз азы размæ.
