Уæвгæ уый æлхæнинæгты æххæст хыгъд нæу
Скъоладзауты уæлæдарæс, пъартфелтæ, канцелярон кусæнгæрзтæ. Ног ахуыры азы агъоммæ ныййарджыты бахъæуы æппæт ацы дзаумæттæ самал кæнын. Уæвгæ уый æлхæнинæгты æххæст хыгъд нæу. Хæрдзтæ чысыл нæ вæййынц, æмæ зынг фæбæрæг вæййынц бинонты бюджетыл.
Сывæллоны ног ахуыры азмæ бацæттæ кæнын бирæ ныййарджытæн вæййы зын. Моргуаты бинонты ис 3 скъоладзауы. Сæ мад Ингæ куыд зæгъы, афтæмæй ног дзаумæттæ, дзабыртæ æмæ канцтовартæ балхæнын ныййарджыты дзыппыл зынгæ фæбæрæг вæййы. Æлхæнын нæ хъæуы æрмæстдæр чингуытæ. Цæмæй иннæ хъæугæ кусæнгæрзтæ балхæнай, уый тыххæй хъæуы бирæ хца æрæмбырд кæнын. 3 сывæллоны цæмæй сараза, уый тыххæй Ингæ бахардз кæны 60 мин сомы онг.
Августы астæу дуканиты бирæ адæм вæййы. Æлхæнджытæн фадат вæййы алыхуызон дзаумæтты хсæн æвзарын. Иуæй – иу хатт формæ равзарыны процесс адаргъ вæййы цалдæр боны онг. Кæд лæппутæн хъæуы классикон костюмтæ æмæ сын æвзарын уыйас нæ хъæуы, уæд чызджытæн уыцы фарстайы зындæр вæййы. Къаба æви сарафан балхæной, уый фылдæр хатт равзары скъола йæхæдæг. Æххæст комплекты аргъ æлхæнæджы домæнтæй аразгæ у, фæлæ хорз дзаумайæн фидын дæр фылдæр хъæуы. Кæй зæгъын æй хъæуы, канцелярон товартыл дæр хъæуы схардз кæнын. Ног ахуыры азмæ сымбырд кæнын хъæуы æппæт хъæугæ кусæнгæрзтæ. Æппæтæй зынаргъдæр слæууы скъоладзауы хызын. Канцтовартæ фылдæр æлхæнынц 10-æм августæй раздæр. Иу бонмæ дуканимæ æрбацæуы 200 адæймагæй фылдæр. Тетрæдтæ, фыссæнгæрзтæ, кърандæстæ æмæ æндæр хъæугæ фæрæзтæ алкæйы фаг дæр сты. Æргътæ сты алыхуызон. Æппæтæй фылдæр схардз кæнынц фыццæгæм кълæсты ныййарджытæ.
Цæгат Ирыстоны 8-æм аз цæуы æххуысы акци «Бацæттæ кæн сывæллоны скъоламæ». Фæллойы æмæ социалон райрæзты министрад фонд «Быть добру»-имæ, проект «Вешалка добра» æмæ центр «Мой бизнес»-имæ бирæсывæллонджын æмæ фæкæсынхъуаг бинонты сывæллæтты сцæттæ кæнынц скъоламæ. Ацы аз канцтовартæ, скъоламæ дзаумæттæ æмæ дзабыртæ лæвар райсдзысты 500 сывæллонæй фылдæр.
Акци æрмæст Дзуджыхъæуы нæ вæййы. Фонд «Быть добру»-йы минæвæрттæ нысан кæнынц республикæйы районты сывæллæттæн дæр баххуыс кæнын. Уымæй уæлдай ма 600 ахуырдзауæй фылдæр материалон æххуыс райсдзысты бирæсывæллонджын бинонты иугондæй.
