Аграрон къабазы кълæстæ фæзындзысты нæ республикæйы алы районы дæр æмæ дзы ахуыр кæндзысты 220 скъоладзауы
Ног ахуыры азы нæ республикæйы иуæндæс скъолайы байгом уыдзысты хæххон аграрон университеты кълæстæ. Аграрон къабазы кълæстæ фæзындзысты нæ республикæйы алы районы дæр æмæ дзы ахуыр кæндзысты 220 скъоладзауы. Уый тыххæй бадзырд бафыстой ахуырады министрад æмæ хæххон паддзахадон аграрон университет. Бадзырды нысан у раг профессионалон ахуырады райрæзтыл кусын. Ахуырады министр Алыбекты Эллæ куыд фæбæрæг кодта, афтæмæй аграрон æмæ туризмы къабæзтæ сты фыццаградонты рæнхъы æмæ уый нымайгæйæ сывæллæттимæ хъæуы кусын æвдæм къласæй фæстæмæ. Уый у кадртæ цæттæ кæныны фыццаг къабаз. Уæ зæрдыл уын æрлæууын кæндзыстæм – нæ республикæйы уал байгом кодтой хæххон металлургон институты иуæндæс къласы, сæ нысан у инженерон ахуырады райрæзт. Цыппар къласы та байгом кодтой медицинон академийы бындурыл. Тагъд рæстæг байгом уыдзысты ЦИПУ-йы кълæстæ химион биологон, физикон техникон æмæ психологон педагогон къабæзты.
