Республикæ, зæгъæн ис, æмæ йæ хуыз скалдта
Ног азмæ ма баззад къуырийæ гыццыл фылдæр. Республикæ, зæгъæн ис, æмæ йæ хуыз скалдта. Театралон фæз аив кæны сæйраг заз бæлас, ирд цырæгътæй æрттивынц хидтæ æмæ фæлладуадзæн зонæтæ. Тагъд кусын райдайдзæн ног азы армукъа. Ацы зын рæстæджы бæрæгбонмæ æмбæлгæ уагыл бацæттæ кæнын æнцон хъуыддаг нæу, зæгъынц Горæтгæрон районы цæрджытæ дæр. Фæлæ уæддæр сæ къухы бафтыди. Ног азы аргъæутты бæстæ бацæттæ кодтой бынæттон цæрджытæн.
Зæгъæн ис, æмæ сæхи аргъæй æрмæст абхазаг мандаринтæ нæ, фæлæ карчы дзидза, æйчытæ, къалбасы продукци, картоф æмæ ма суанг нартхор дæр. Октябрьскæйы ног азы армукъа кусын райдыдта декабры астæу, куыд фæстæмæ æлхæнджытæ кæнынц фылдæрæй-фылдæр.
Армукъа аразджытæ архайынц, цæмæй дзы фылдæр уа бынæттон продукци. Алцыдæр арæзт у, цæмæй бæрæгбоны стъол уа бæркадджын, фæлæ уыцы иу рæстæг æнæ стыр хæрдзтæй. Ам балхæнæн ис заз бæлæстæ дæр, стæй сæ аивгæнæнтæ.
Цæмæй бæрæгбон сæхиуыл æххæстæй банкъарой, уый тыххæй æппæт мадзæлттæ сарæзтой æппæты кæстæртæн дæр. Афæдзы ацафон, иууылдæр æнхъæлмæ фæкæсынц цавæрдæр диссæгтæм, уæлдайдæр та сабитæ.
Кæд дзыллон мадзæлттæ ацы аз пандемйæйы тыххæй кæнæн нæй, уæддæр Сунжæйы рæвдауæндоны ссардтой гæнæн.
Сунжæйы астæуккаг скъолайы бæрæгбон сарæзтой хистæртæ, ахуыргæнджытæ æмæ ныййарджытæ сæхæдæг. Фæлладуадзæн бонты кодтой митын лæгтæ æмæ гирляндæтæ. Сывæллæттæн æй нæ хъæр кодтой, æмæ къуырисæры куы æрбацыдысты, уæд скъоламæ бацæуæн зонгæ дæр нал бакодтой. Аргъæутты бæстæ сарæзтой кълæсты дæр. Æххуыс сын кодтой хистæркъласонтæ дæр.
Скъолайы директор зæгъы, бæрæгбоны æнкъæрæнтæ скæнынæн бирæ нæ хъæуы.
Октябрьскæйы центры ныртæккæ у зымæгон аргъауы хуызæн. Бынæттон цæрджыты зæрдæмæ ахæм лæвар фæцыди. Цæст рæвдауынц алыхуызон ирд цырæгътæ æмæ ног азы æууæлтæ.
Ацы аз ног азы сæйраг фидауц – заз бæлас бирæ хъазæнтæй нæ саив кодтой. Хъæды кусджытæ куыд загътой, афтæмæй бæлас æнæуидæр хъыгдард баййæфта, иу ранæй йæ кæй скъахтой, æмæ йæ иннæ ран кæй ныссагътой, уый тыххæй. Уымæ гæсгæ йыл ацы аз уæззæуттæ нæй ауындзæн. Фæлæ йæ фидæны гæнæн уыдзæн, æндæр хуызæн аразынæн дæр.
