Цæрæнуæтты комплекс «Ног горæт» эксплуатацийы куы радтой, уæдæй фæстæмæ дзы рухсытæ ссыгътой æрмæстдæр дыууæ хатты
Ног технологитæ, фæлæ лыггæнинаг фарстатæ куыд уыдысты, афтæ сты ныр дæр. Цæрæнуæтты комплекс «Ног горæт» эксплуатацийы куы радтой, уæдæй фæстæмæ дзы рухсытæ ссыгътой æрмæстдæр дыууæ хатты. Цæмæн афтæ рауад, æмæ цы у уавæры аххосаг, уый раиртасыныл бацархайдта не сфæлдыстадон къорд, æмæ бæлвырддæр хабæрттæ радзурдзæн Гæджиты Сослан.
Дзусты Ибрагимы уынджы 6 «Г» хæдзары цæрджытæ хъаст кæнынц сæ кæрты рухс кæй нæй, уымæй. Цалиты Виталий дзы æрцарди, хæдзар куыддæр сарæзтой, афтæ. 5 азы рацыд, фæлæ фарста абон дæр лыггонд нæма у. Кæрты бирæ сывæллæттæ ис, æмæ уымæ гæсгæ ахæм кæрты цæрын тæссаг у. Цæмæй уавæр фæхуыздæр уа, уый тыххæй цæрджытæ иумæйаг тыхтæй сывæллæтты хъазæн фæзы цур æрцауыгътой рухсгæнæн цырæгътæ.
Æмæ ма уыцы фарста иу куы уыдаид, уæд афтæ зæрдæхсаинаг нæ уаид уавæр. Рухс дзы кæй нæй, уый иу, фæлæ дзы электрон тыхдæттæг телтæ раст ауыгъд кæй не сты, уый та æндæр хъуыддаг. Хæдзар амад куы фесты, уæд телтæ æнæбары ауыгъд скодтой, æмæ ныр цæрджытæн сты тæссаг, уымæн æмæ цы хæтæлтыл ауыгъд сты, уыдон ныкъкъæдз сты.
Цæмæй сын сæ фарста алыг кæной, уый тыххæй хæдзары цæрджытæ сæ курдиæттæ бахастой Дзæуджыхъæуы администрацимæ æмæ адæмон фронтмæ.
Цæгæраты Руслан, адæмон фронты цæгатирыстойнаг штабы æмсæрдар: «Абон стæм Дзусты Ибрагимы уынджы. Хæтæлтæ дзы раст конд не сты, уымæн æмæ сæ кодтой цыбыр рæстæгмæ. Ныр зæххы бын ногтæ скодтой æмæ уыдон кусдзысты. Рæстæгмæ цы скодтой, уыдон та иууылдæр айсдзысты. Цырагъ цæй тыххæй нæй, уый дæр сбæрæг кæндзыстæм. Бацархайдзыстæм, цæмæй тагъд рæстæджы фарстатæ лыггонд æрцæуой».
Адæмон фронты минæвæрттæ архайынц, цæмæй фарста тагъд рæстæджы аиуварс кæной. Фæсидтысты горæты администрацимæ, цæмæй хъуыддаг сæхи къухтæм райсой æмæ райдайой эксплуатаци.
