Бæрæгбоны мадзæлттæ, тематикон фæзтæ, концертон программæ
Ногир сбæрæг кодта йæ 100 азы юбилей. Бæрæгбоны мадзæлттæ, тематикон фæзтæ, концертон программæ. Хъæу йе нусы сæрты акасти хъæздыг бынтимæ. Цæрджытæн арфæ ракæнынмæ сæмбырд ис бирæ адæм. Се хсæн Горæтгæрон районы разамынд, сыхаг хъæуты администрациты сæргълæуджытæ, Ногирæй рацæуæг адæм. Хъæуæн бындур æвæрд æрцыди 1921-æм азы. Уæд дзы æрбынат кодтой Хуссар Ирыстонæй фыццаг рацæуджытæ. Раздæр ацы зæххытæ уыдысты артполигоны. Абон Ногир нымад у зындгонд адæм æппæтæй фылдæр кæм цæры, ахæм хъæуыл. Амы цæрджытæн ис сæ сæр бæрзæндты кæмæй хæссой, уый. Бирæтæ дзы зындгонд сты æрмæст сæ райгуырæн бæстæйы нæ, фæлæ æндæр рæтты дæр. Поэт Джусойты Нафи, фыссæг Дзесты Куыдзæг, профессор Цхуырбаты Федыр, коструктор Къомайты Руслан. Ногир у чемпионты райгуырæн хъæу дæр. 4 спортсмены дзы схызтысты Олимпы бæрзæндтæм. Юбилеймæ скульптор Зæнгиаты Таймураз сарæзта цыртдзæвæн. Равдыста дзы Ногиры фыццаг цæрджыты. Монумент æвæрд æрцыди хъæуы астæу.
