Хуыздæрты кадджын уавæры схорзæхджын кодтой Мæскуыйы облæсты Хицауады хæдзары
Ногиры 2-æм скъолайы ахуырдзаутæ систы 8-æм æппæтуæрæсеон конкурсы уæлахиздзаутæ æмæ лауреаттæ. Хуыздæрты кадджын уавæры схорзæхджын кодтой Мæскуыйы облæсты Хицауады хæдзары. Бæлвырддæр хабæрттæ радзурдзæн Хъайтмазты Дзерассæ.
Хуыгаты Давид ацы рæнхъытæ иттæг хорз бахъуыды кодта. Уымæн æмæ архайдта æппæтуæрсеон конкурсы – «Уæрæсейы гимн æмбаргæ ныхæстæй». Ногиры 2-æм скъолайы ахуырдзау сси лауреат номинацийы «Уæрæсейы æмæ чысыл райгуырæн зæххы гимнты иумæйаг мидис рабæрæг кæныны тыххæй видеоролик». Лæппу райста Уæрæсейы æмæ Цæгат Ирыстоны гимнтæй фæйнæ иу рæнхъы æмæ сæ абарста. Ацы куыст ын цымыдисаг уыд.
Давидимæ конкурсы архайдтой йе мкъласонтæ дæр. 3 мæйы цæттæ кодтой – куыстой дзырдуæттимæ, иртæстой текст. Афтæмæй Ногиры 2-æм скъолайы кадетон къласы ахуырдзаутæ фæуæлахиз сты «Рæсугъд æмæ раст ныхасы тыххæй» сæрмагонд номинацийы. Ерысы стыр конкуренци уыд. Конкурсмæ æрвыст æрцыд 17 мин куыстæй фылдæр Уæрæсейы 89 регионæй æмæ 9 фæсарæйнаг бæстæйæ. Уæлахиздзаутæ систы 36 адæймаджы 24 регионæй, сæ хыгъды Цæгат Ирыстонæй дæр. Се *хсæн – Карсанты Виктория, Хуыгаты Давид, Кочиты Даниэль, Засеты Давид. Рæзгæ фæлтæры сæхи бафæндыд сæ тыхтæ бавзарын, уый тыххæй загътой сæ ахуыргæнæгæн. Конкурсæн æрмæг истой Барбашовы фæзы, Гæздæнты æфсымæртæн цыртдзæвæны цур æмæ Намысы Аллеяйы. Уырныдта сæ, кæй рамбулдзысты, уый.
Хуыздæрты схорзæхджын кодтой Мæскуыйы облæсты Хицауады хæдзары. Мадзал сси регионты хсæн форум «Патриот – æз дæн!»-ы ахуырадон программæйы хай. Конкурс æххæстгонд цæуы нацпроект «Ахуырад»-мæ гæсгæ. Ногиры скъоладзаутæ дзы фыццаг хатт нæ фæуæлахиз сты. Фарон кадетон къласы ахуырдзау Хуыгаты Нинæ рамбылдта номинацийы – «Уæрæсейы гимны тыххæй видеоролик кæнæ мультфильм».
Конкурс арæзт æрцыд 8-æм хатт. Йæ хатдзæгтæ фæсивæдæн фидæны баххуыс кæндзысты уæлдæр ахуыргæнæндæттæм бацæугæйæ. Ногиры скъоладзаутæ фæнд кæнынц конкурсы сæ тыхтæ иннæ аз дæр бавзарын. Сæ зæрдæ дарынц, ногæй та уæлахиз сæ къухы кæй бафтдзæн, ууыл.
