Рагæй кæмæ æнхъæлмæ кастысты, уыцы цау нысангонд у 1-æм ноябрмæ
Ногиры хиды сæрты фæндаггон змæлд байгом кæнынмæ баззади чысыл рæстæг. Рагæй кæмæ æнхъæлмæ кастысты, уыцы цау нысангонд у 1-æм ноябрмæ. Ног хид уыдзæн зынгæ фидардæр æмæ æнцонвадат, зæрондимæ абаргæйæ. Ныртæккæ цæуынц кæронбæттæн куыстытæ, аразынц фистæгæй цæуджытæн къахвæндаг, рацараздзысты хиды бын дæр. Бæстондæр радзурдзæн Чехойты Фатимæ.
Ногиры хиды арæзтады кæронбæттæн куыстытæ бацыдысты сæ тæмæны. Объект раттынмæ цæттæ у. Сæйраг къæпхæнтæ фесты, конд æрцыд егъау куыст, зæгъынц специалисттæ.
Ногир æмæ Михайловскæ иугæнæг хид уыдзæн æнцонвадатдæр, зæрондимæ абаргæйæ. 120 метры дæргъæн, лæууы 6 михыл, йæ фæйнæфарс уыдзæн къахвæндæгтæ фистæгæй цæуджытæн. Хид уыдзæн фидар, цы михтыл лæууы, уыдоны руаджы. Уыдон сагъд сты цæугæдонæй 18 метры бындæр. Объект аразгæйæ специалисттæ зындзинæдтæ æвзæрстой фыццаг рæстæг.
Специалисттæ ныффидар кодтой былгæрæттæ, ныссыгъдæг кодтой донвæд. Подрядон куыстуат фыццаг хатт нæ аразы ахæм объект. Ныридæгæн ма æрмæст хиды алыварс территори рацаразын хъæуы.
Хиды галиу фарс кусджытæ архайынц фистæгæй цæуджытæн къахвæндаг саразыныл. Специалисттæ ныфс æвæрынц, дыууæ былы иугæнæг объект ноябры цæттæ кæй уыдзæн, уымæй. Хид арæзт цæуы национ проект «Цардæн инфраструктурæ» æххæстгæнгæйæ.
