Сæ арæхстдзинад дзы бафæлвæрдтой не мзæххонтæ, Цыколайы адæмон театры хæдахуыр артисттæ.
Новороссийскы арæзт æрцыд хæдахуыр æмæ студентон театрты Æппæтуæрæсеон фестиваль. Сæ арæхстдзинад дзы бафæлвæрдтой не мзæххонтæ, Цыколайы адæмон театры хæдахуыр артисттæ. Аивадуарзджыты размæ рахастой Гуыцмæзты Михалы пьесæмæ гæсгæ æвæрд спектакль «Бирæгътæ». Йæ сæйраг темæ – фæлтæрты хсæн ахастдзинæдтæ. Кæд актертæ дыгуронау дзырдтой, уæддæр жюрийы уæнгтæн уый цæлхдур нæ уыди. Афтæмæй Цыколайы культурæйы хæдзары театр сси фестивалы уæлахиздзауы ном хæссæг. Ныр та сæхи цæттæ кæнынц радон конкурсмæ. Уыдзæн Мæскуыйы.
Дæ куыст куы уарзай æмæ йæ зæрдиагæй куы æххæст кæнай, уæд ын адæм æнæмæнгæй стыр аргъ скæндзысты. Чи зоны, уый руаджы бафтыд стыр æнтыстдзинæдтæ Цыколайы районы культурæйы галуаны адæмон театры артистты къухы. Сæрмагонд ахуырдзинад сæм кæй нæй, уый сæ курдиат æмæ сæ зæрдæйы цæхæрæй бæрæг дæр нæ дары. Спектаклы дæргъы театруарзæг бахауы ирд æнкъарæнты уацары. Рæстæгæй-рæстæгмæ йæ цæсгомыл фæзынынц цины, хъыджы, кæнæ та æгуыппæгдзинады тынтæ. Гуыцмæзты Михаилы пьесæ «Бирæгъты» равдыстой кæстæрты æмæ хистæрты ахастдзинæдтæ. Бинонты хистæр йæхи мардæфсон скодта æмæ иуварсæй кæсы, йæ бинонтæ сæхи хистмæ куыд цæтæ кæнынц, уымæ.
Цин æмæ хъыджы цæссыгтæ баиу сты. Спектакль сæвæрæг Зехъеты Хетæг театрдзауты размæ хæссы нырыккон æхсæнады хъæндзинæдтæ. Фыццаг адæймаджы уырнгæ дæр нæ кæны, сценæйы цытæ цæуы, уыдон. Фæлæ саударæн мадзæлттæм цæттæ кæнгæйæ раргом вæййы зианджын бинонты миддуне. Стыр бинонты хсæн ныхмæлæуд, чындзыты дамдумтæ æмæ кæрæф сыхæгтæ. Театрдзауы бон у æрмæстдæр додой кæнын сценæйы цытæ цæуы, уыдоныл.
Новороссийскы хæдахуыр æмæ студентон театрты Æппæтуæрæсеон фестивалы спектакль равдыстой дыгурон диалектыл. Фæлæ жюри уæддæр аккаг аргъ скодта уацмысæн. Эксперттæ куыд загъой, афтæмæй артистты курдиаты фæрцы спектакль æндæр æвзагыл кæй уыдис, уый аивадуарзджытæ æмбаргæ дæр нæ бакодтой. Новороссийскæй цыколайаг къорд сласта цалдæр хæрзиуæджы.
Ацы хæрзиуæг Аркъауты Джульеттæйæн тынг зынаргъ у. Жюри йын йæ роль банымадта æппæты хуыздæрыл. Артисткæ куыд зæгъы, афтæмæй йæ цард театрæн нывондгонд у. Сценæйы ис фæндзай азы. Ацы хæрзиуæг та у йæ курдиаты æвдисæндар.
Ацы уæлахиз хæдахуы театрæн фыццаг нæу. Тагъд рæстæг сæм æнхъæлмæ кæсы хæдахуыр театрты конкурсы радон къæпхæн Мæскуыйы.
