Йæ саразджытæ профессионалон скульптортæ не сты, фæлæ хуымæтæг кусджытæ
Стыр Уæлахизы 80 азы агъоммæ Цæгат Ирыстоны зилынц æппæт æфсæддон мемориалтæм. Нузалы раздæры госпитæлы территорийы ис цымыдисаг цыртдзæвæн æмæ æфсымæрон ингæн. Йæ саразджытæ профессионалон скульптортæ не сты, фæлæ хуымæтæг кусджытæ. Ныртæккæ цыртдзæвæн у базилинаг.
Æгæр бæрнон аргъ кæнын нæ хъæуы, сæйрагдæр у – цы мидис дзы ис, уый. Афтæ, ацы скульптурæйы тыххæй йæ хъуыды райхæлдта паддзахадон куыстуат «Аланты хæзнаты» разамонæг Габоты Людмилæ. Композицийы бындур æмæ мидис æцæгæйдæр сты тынг арф. Скульптурæимæ мæсыг дзы фæзынди 1967-æм азы, Нузалы рынчындоны сæйраг дохтыр Уалыты Дмитрийы хъæппæрисæй.
1942-æм азы Нузалы рынчындоны бæстыхайы уыди госпитæль. Гыццыл æддæдæр дзы ныгæд сты, уыцы рæстæг сæ цæфтæй чи амарди, ахæм æфсæддонтæ. 19 салдаты æмæ офицеры ам баззадысты æнустæм. Мемориалон къæйыл 18 æфсæддоны нæмттæ. Нузалы ныгæд чи ис, уыдоны бæрæггæнæнты базæйы бæрæггонд у 19-æм салдат дæр. Уыди Воронежы облæстæй, хистæр сержант Иван Дроздов. Хæст схæццæ хæххон хъæумæ дæр.
Ацы гыццыл хъæуы историон бынтæ адæймаджы дисы æфтауынц. Раздæры рынчындоны бæстыхайы фæстæ хъахъхъæд æрцыд кувæндон Æргом. Ис советон рæстæджыты хæдзарадон арæзтæдты цур. Иу фæзы фенæн ис алы дугты æууæлтæ, фæлæ сæ иу кæнынц историон тæгтæ.
Æнахуыр цымыдисаг скульптурон композици цæмæдæр гæсгæ рохуаты аззад, зæгъы специалист. Фыццаджыдæр уал æм хъæуы базилын, уый зын нæу. Сæйрагдæр та – ахъуыды кæнын хъæуы æмтгæй райсгæйæ Нузалы фидæныл. Кæддæр, Аланты паддзахады тæккæ сæйрагдæр бынат кæм уыди, уыцы хæххон хъæуыл.
