Пайда дзы кæнынц 3 милуаны æмæ 500 адæймаджы
Нырыккон скъоладзаутæн сæ бæрæггæнæнтæ бамбæхсыны фадат нал ис. Ныййарджытæн сæ бон у алцæмæ дæр электрон хуызы кæсын: урокты фæтк, бæрæггæнæнтæ æмæ хæдзармæ куыст фенæн ис ахуырадон платформæ «Дневник.ру»-йы. Пайда дзы кæнынц 3 милуаны æмæ 500 адæймаджы. Ног системæйы тыххæй бæстондæр радзурдзæн Чехойты Фатимæ.
Урок фæци æмæ ахуыргæнæг бавнæлдта журналмæ – гæххæттынмæ нæ, фæлæ электронмæ. Иу ран æмбырдгонд сты алыхуызон ведомосттæ, скъоладзауты цæттæдзинад æвдисæг хатдзæгтæ. Иумæйаг информацион-ахуырадон хыз зондамонджытæн, скъоладзаутæн æмæ ныййарджытæн «Дневник.ру» æнтыстджынæй равдыста йæхи, зæгъынц ахуыргæнджытæ.
Ахуырадон хыз «Дневник.ру» -йæ пайда кæнынц 3 милуан æмæ 500 адæймаджы. 11-æм скъолайы алы къласы дæр ис компьютер ацы программæимæ. Ахуыргæнджыты ныхæстæм гæсгæ дзы æнцонæй пайдагæнæн ис. Берозты Каринæ ацы программæйы фархайы, куыд ахуыргæнæг æмæ куыд ныййарæг, афтæ.
Кæцы фæнды рæстæг дæр ам фенæн ис бæрæггæнæнтæ, урокты фæтк, хæдзармæ куыстытæ, базонын ахуырады къабазы ног хабæрттæ. Программæ афтæ арæзт у, æмæ скъоладзауы тыххæй хабæрттæ феныны фадат уыдзæн æрмæстдæр йæ ныййарджытæн.
Гæххæттын боныгтæ ныр скъоламæ хæссынц сывæллæтты æмæ ныййарджыты фæндонмæ гæсгæ, цæмæй дзы ахуыргæнджытæ бæрæггæнæнтæ æвæрой, уый тыххæй. Фæлæ фидæн, специалистты хъуыдымæ гæсгæ, у нымæцон технологиты рæстæг.
