Æхсæнадон транспорт уырдæм нæ цæуы. Заууатмæ æрцыд къахвæндаг дæр. Йæ алыварс у чъизи, нæй дзы рухс.
Дзуццаты Надеждæ завод «Топаз»-ы кусы ныр 17 азæй фылдæр. Ацы фæндагыл алы бон дæр фæцæуы йæ куыстмæ. Адæм хъаст кæнынц, æхсæнадон транспорт горæты промышленнон районмæ кæй нæ цæуы.
Дзуццаты Надеждæ завод «Топаз»-ы кусы ныр 17 азæй фылдæр. Ацы фæндагыл алы бон дæр фæцæуы йæ куыстмæ. Адæм хъаст кæнынц, æхсæнадон транспорт горæты промышленнон районмæ кæй нæ цæуы.
Дзуццаты Надеждæ, завод «Топаз»-ы кусæг: «Ардæм раздæр кæд транспорт цыди, уæд ныртæккæ ницыуал цæуы, цæуæм фистæгæй, уарыны дæр. Переезды, стæй Æфсæнвæдаджы техникумы рæзты æмæ дзы у тынг чъизи. Сæ канализацитæ сты æхгæд хъæдæрмæгæй æмæ уаргæ бон уæлæмæ ссæуынц æмæ йын йæ тæфæй дæр ацæуæн нæй. Йæ алыварс у бырон. Сывæллæттæ дзы куыд фæбадынц æмæ фæхæрынц, уыцы бырæттæ аппарынц. Раздæр-иу цыдыстæм Черменыхъæуы кæнæ Ольгинскæйы транспортыл, фæлæ нæ уыдон дæр нал исынц. Райсомæй нæ исынц туман, ныр та 2 туманы æмæ уый та махæн у зынаргъ».
Къахвæндаг райдайы Чкаловы æмæ Марковы уынгты тигъыл, цæуы æфсæнвæндаджы техникумы æмæ завод «Победит»-ы цур, стæй уæд рахæццæ вæййы Ватутины уынгмæ. Æмæ кæд раздæр уыд асфальтæй æмбæрзт, уæд ныр уымæй ницыуал баззад. Уыцы ран ма æрæмбырд вæййынц фæсивæд дæр, кæнынц алыхуызон æбуалгъ митæ, чъизи кæнынц къахвæндаджы алыварс.
Багаты Фатимæ, 11 азы топазы кусы: «Хутдзысты дын дæ фæдыл, цыма адæймаг дæр нæ дæ, уыййау. Æмæ ам фæбадынц бон изæрмæ. Ацы чъизийы нæ бон нал у хизын. Уаргæ бон та дзы ахизæн нæ вæййы. Кирпичтæ ссарæм, сывæрæм сæ, æмæ уыдоны сæрты ахизæм, счъизи вæййæм, фæлæ цы кæнæм».
Сæ хъаст адæм бирæ рæттæм бахастой. Фарста аиуварс кæныныл нырмæ ничи бацархайдта. Адæмы фæнды, цæмæй Дзæуыджыхъæуы фæзына, промышленнон районмæ чи хæццæ кæндзæн, ахæм марштурткæ. Горæты администрацийы зæрдæ бавæрдтой, фарстайыл бакусынæй. Транспорт, промышленность æмæ бастдзинады управленийы хицау Гæздæнты Мурат куыд загъта, афтæмæй куыстуаты специалисттæ сбæрæг кодтой, горæты цы маршруттæ кусы, уыдон. Равзæстой 37-æм маршрут, уымæн æмæ хæццæ кæны Дзæуджыхъæуы районтæн сæ фылдæрмæ æмæ уый ныр кусдзæн Промышленнон районы дæр.
Гæздæнты Мурат, Дзæуджыхъæуы администрацийы промышленносты æмæ бастдзинады управленийы хицау: «Горæты цæрджытæн 1-æм ноябрæй сæ бон пайда кæнын уыдзæн 37-æм маршрутæй. Сæвæрдзыстæм дзы 2 автобусы дæр, цæмæй сæ пайда кæной, льготæтæ кæмæн ис, æмæ сæ бон лæвар цæуын кæмæн у, уыцы адæм дæр. Æхсæнадон транспорт кусдзæн алы бон дæр, изæры 8 сахатмæ æмæ лæггад кæндзæн промышленнон районы цы адæм кусы, уыдонæн».
37-æм маршрут раздæрау цæудзæн Пожарскийы æмæ Леоновы уынгты, 34-æм æмæ 35-æм микрорайонты, Штыбы фæзы, Павленкойы æмæ Пушкинскийы уынгты. Дардæр 37-æм маршруткæ цæудзæн кинотеатр «Дружба»-йы онг, æмæ Ватутины уынджы дæлæмæ 3-аг промышленнон уынгмæ. Ацы ивддзинæдтæ хаст æрцыдысты маршруты схемæмæ æмæ сæ сфидар кодтой фæндæгтыл æдасæй цæуыны паддзахадон инспекциимæ дæр.
Гугкаты Иринæ
