Республикæйы цæрджытæн æмæ уазджытæн фадат ис музыкæмæ байхъусынæн, стæй ма акафынæн дæр
Музыкалон проспект. Ныр дыккаг аз фæд-фæдыл нæ горæты сæйраг уынджы – Сабырдзинады проспекты цæуынц музыкалон изæртæ. Республикæйы цæрджытæн æмæ уазджытæн фадат ис музыкæмæ байхъусынæн, стæй ма акафынæн дæр. Уæвгæ, афæдзæй-афæдзмæ Кавказы культурон сæйраг горæт йæхимæ лвасы фылдæр адæмы.
Дæсгай адæймæгты алы бон дæр æрæмбырд вæййынц Сабырдзинады проспекты, цæмæй банкъарой изæрыгон Дзæуджыхъæуы рæсугъддзинад. Бынæттон зарæггæнджытæ горæты цæрджыты æмæ уазджыты размæ рахæссынц сæ уарзон зарджытæ. Ныр дыккаг аз фæд-фæдыл нæ горæты сæйраг уынджы арæзт фæцæуынц ахæм цымыдисаг концерттæ.
Елойты Екатеринæйы зæрдæмæхъаргæ хъæлæс бынæттон цæрджытæ хорз зонынц. Къуыри иу хатт фæзары гом арвы бын Дзæуджыхъæуы тæккæ астæу. Проект «Музыкалон проспект»-ы архайы дыккаг аз. Зæгъдзыстæм ма уый дæр, æмæ йæ репертуар у алывæрсыг æмæ хъæздыг. Фæлæ æнæивгæ у иу хъуыддаг. Кæддæриддæр йæ концерт райдайы патриотон композицийæ.
Уæвгæ, изæрыгон Дзæуджыхъæу рæвдауы алкæйы цæст дæр. Сценæйы тæккæ астæу фæкафынц сывæллæттæ. Æмæ уыцы чысыл артистты хореографийæн вæййынц аргъгæнджытæ. Чидæр йæ уарзон зарджытæм фæхъусы, чидæр та къамтæ исы. Ацы фæз сси хорз зонгæты æхсызгон фембæлдтыты бынат. Зæгъæн ис, æмæ изæрыгон горæт цæры уарзон музыкæйы зæлтæм хъусгæйæ.
Сабырдзинады проспекты уыцы-иу рæстæг ис цалдæр ирхæфсæн фæзы фæллад уадзынæн. Музыкалон проспектæй дарддæр ма сфæлдыстадон фæсивæд фæзарынц сæ авторон композицитæ. Национ мотивтæм гæсгæ та бынæттон кафджытæ раргом кæнынц сæ хореографион курдиат. Стыр уынджы иннæ кæрон та æппæтæй кæстæртæ хъазынц фонтаны цур. Афæдзæй-афæдзмæ Кавказы культурон сæйраг горæт йæхимæ лвасы фылдæр адæмы. Æмæ уый у æхсызгон хъуыддаг се ппæтæн дæр.
