Ахæм куыст цæуы Сунжæйы скъолайы дæр
Ныртæккæ скъоладзаутæ сæхи цæттæ кæнынц иумæйаг паддзахадон фæлварæн раттынмæ. Ахæм куыст цæуы Сунжæйы скъолайы дæр. Сæ уроктæ райдыдтой ивгъуыд къуырийы. Цæуынц платформæ «Вебинар ФМ»-ы. Ахуыртæ амонынц уæлдæр ахуыргæнæндæтты хуыздæр педагогтæ æмæ наукон кусджытæ. Онлайн-скъолайы иумæйаг паддзахадон фæлварæны хуызы дæттынц æппæт предметтæ дæр. Бæлвырддæр хабæрттæ радзурдзæн Касаты Наирæ.
Сунжæйы скъолайы иумæйаг паддзахадон фæлварæнмæ цæттæгæнæн дистанцион ахуыртæ. Рæзгæ фæлтæр сæйраг ахуырты фæстæ интернеты уылты архайынц ацы ахсджиаг хъуыддагыл. Фæлæ интернетимæ къуылымпытæ кæмæн ис, уыдонæн та сæ бон у, скъолайы «Точка роста»-мæ æрбацæуын. Ам алцыдæр у æмбæлгæ уагыл конд.
Ахуыртæ райдыдтой къуырисæры. Цæуынц «Вебинар ФМ»-ы платформæйыл. 3 бонмæ фæсивæдæн бантыст сæхи хатдзæгтæ скæнын. Куыд зæгъынц, афтæмæй ахуыртæ сты æмбæрстгонд, информаци райсын у алкæйы бон дæр. Иумæйаг чаты гæнæн ис фарстатæ раттынæн дæр.
Ацы мадзæлттæ ахуырты бæсты не сты, фæлæ уыдонмæ уæлæмхасæны хуызы. Сты ахадгæ æххуыс. Æмæ æрмæст ахуырты нæ, фæлæ сæхи фидарæй æнкъарынæн дæр. Уымæн æмæ фæлварæнтæ кæдфæнды дæр скъоладзаутæн вæййынц стыр бæрнондзинад, уыимæ та тыхсгæ дæр фæкæнынц. Ахуырдзаутæ зæгъынц, афтæмæй сæхи æнкъарынц хъæддыхдæрæй.
Скъоладзаутæ сæ хъуыдытæ загътой ацы мадзæлттæм ма цы батыдтаиккой, уый. Ис дзы гыццыл фиппаинæгтæ.
Цæгат Ирыстоны ахуыргæнджыты дæсныйад уæлдæргæнæн институты зæгъынц, ахæм уавæрæй æнæмæнгæй спайда кæндзысты. Æрмæстдæр хъæуы гыццыл банхъæлмæ кæсын. Видеойыл бакусынæн хъæуы рæстæг.
Ахæм хуызы ахуыртæ ам ныридæгæн арæзтой. Фæлтæрддзинад сæм ис. Фыццаг бонты дзы уыди гыццыл къуылымпыдзинæдтæ, фæлæ ныр, хъуыддаг у куыд æмбæлы, афтæ.
Бакуыстой алы фæзилæныл дæр. Ахуыртæ рæстæгмæ гæсгæ кæрæдзийы нæ хъыгдардзысты. Гуманитарон æмæ зæгъæм, физикон-математикон предметтæй ахуыртæ цæудзысты хицæнтæй. Ахуыргæнджыты дæсныйад уæлдæргæнæн институты зæгъынц, иумæйаг паддзахадон фæлварæн радтæн ис æнæ репетитортæй.
Ахуыртæ кæнынц уæлдæр ахуыргæнæндæтты хуыздæр педагогтæ æмæ наукон кусджытæ. Уæвгæ та уавæртæ арæзт æрцыди республикæйы сæргълæууæджы уынаффæмæ гæсгæ. «Онлайн скъола»-йы æххæстгонд цæуынц иумæйаг паддзахадон фæлварæны форматы цы предметтæ ис, уыдон се ппæт дæр.
