Экспозици дисы æфтауы йæ тематикæйæ æмæ аивадон техникæтæй
Нывгæнджыты цæдисы байгом æрвылазон фæсивæдон равдыст «Ирыстоны æрыгон фæлтæр». Экспозици дисы æфтауы йæ тематикæйæ æмæ аивадон техникæтæй. Сæ куыстытæ йæм бахастой 60 мастеры онг. Кусынц аивады алы къабæзты – нывкæнынады æмæ графикæйæ райдай, æмæ керамикæйæ, стæй æрмдæсныйадæй фæуы. Алы уацмысы дæр банкъарæн ис йæ авторы уды хай. Уыимæ аивадуарзджыты размæ рахæссы аивадон сфæлдыстады уникалон дуне. «Ирыстоны æрыгон фæлтæр» – æрмæст нывты равдыст нæу, фæлæ ма аивады бæрæгбон дæр. Йæ сæйраг нысан у æрыгон нывгæнджыты разæнгард кæнын æмæ аивадуарзджыты зæрдæтæ рухс кæнын. Æрыгон авторты республикон равдысты ма фенæн ис алы æмвæзады нывгæнджыты куыстытæ дæр, куыд æрыгæтты, афтæ фæлтæрдджын мастерты, æмæ ма суанг Уæрæсейы нывгæнджыты Цæдисы уæнгты дæр.
