Æрмдæсны райгуырд Краснодары крайы, фæлæ аивадон ахуырад та райста Цæгат Ирыстоны
«Уарзонæй Ирыстонæн!». Нывгæнджыты Цæдисы байгом Любовь Пушкарева-Портновайы куыстыты юбилейон равдыст. Æрмдæсны райгуырд Краснодары крайы, фæлæ аивадон ахуырад та райста Цæгат Ирыстоны. Ахуыры фæстæ баззад Дзæуджыхъæуы. Йе сфæлдыстады фылдæр архайы монументалон нывкæнынады, графикæйы, æрмдæсныйады. Любовь Пушкарева-Портновайы курдиатæн æвдисæн у уый, æмæ йæ куыстытæ кæй ис фенæн бирæ рæтты галереяты æмæ хи коллекциты. Сæрмагондæй – Францийы, Германийы, Латвийы, Польшайы. Нывгæнæджы ныхæстæм гæсгæ йæ ирд куыстытæ аразынмæ уæлмонц кæны Ирыстоны æрдз. Авторы нырыккон хуызы фыст нывтæ хицæн кæнынц сæ арф хъуыдыйæ, хъæддаг цæрæгойтæй æмæ зайæгойты хъæздыг дунейæ. Любовы коллекцийы ис куыд натюрморттæ, афтæ абстрактон нывтæ.
