Фæлæ уыцы бæрæггæнæнтæ сты дзæвгар фылдæр. Уый тыххæй йæ пресс-конференцийы фехъусын кодта наркотиктæм цæстдарæг федералон службæйы республикон управленийы сæргълæууæг Александр Шевалье.
Сæйраг наркопъæлицæйаг, йæ ног бæрнон бынаты уæвгæйæ, журналисттимæ фембæлд фыццаг хатт. Куыд загъта, афтæмæй наркомани æхсæнадæн, терроризмæй къаддæр зиан нæ хæссы. Нæ республикæйы цы фыдракæндтæ æрцæуынц, уыдонæн сæ цыппæрæм хай баст у наркотикты зилдухимæ. Цæгат Ирыстонмæ героин ласынц Афганистанæй, кокаин – Латинаг Америкæйæ, синтетикон наркотиктæ та кæнынц алы ран дæр. Фарон æхгæд æрцыд æрмæстдæр иу афтек, хъуыстгонд препарат «Лирикæ» кæм уæй кодтой, ахæм. Официалон æгъдауæй наркотикыл нымад чи нæу, ахæм тыхджын препараттæ фæзынынц алы къуыри дæр. Фæлæ сæ цæмæй уæй кæныны бар ма уа, уый тыххæй хъæуынц азтæ. Александр Шевалье ма куыд загъта, афтæмæй нæ сæйраг хæс у фылдæр профилактикон мадзæлттæ аразын.